Zo nun mawi vawng him turin chah

Art & Culture department hnuaia Institute of Music and Fine Arts (IMFA) chuan nimin khan Vanapa Hall-ah IMFA-a zir 68th batch-te pualin Graduation Day an hmang a, Art & Culture minister C Lalsawivunga'n a hmanpui.

C Lalsawivunga chuan nimina Vanapa hall-a Institute of Music and Fine Arts (IMFA) 68th Batch Graduation Day a hmanpuinaah thu sawiin, Zo nun mawi, aia upa zahna leh tlawmngaihnate vawng him turin kalkhawmte a chah.

C Lalsawivunga chuan, IMFA-a zirlaite chu Mizo hnam zia leh nunphung vawng him tura an inpekna leh an thiamnate fakawm a tih thu a sawi a, "Hnam nunphung vawng nung tlat ang che u. Hnam changkang apiangin mahni hnam nun vawnhim leh chawisan chu khawi hmunah pawh awm se, an ngaih pawimawh ber a ni. Hnam anga kan ro hlu Zo nun mawi, aia upate zahna leh tlawmngaihnate hi vawng himin chhawm nung zel ang che u," a ti.

Graduation Day hi Art & Culture director Carol VLMS Dawngkimi'n a kaihruai a; department hotu te, IMFA zirlai nu leh pa te, college hrang hrang zirlaite an tel. IMFA zirlaite'n zai, lemchan leh lâmte an entir a; IMFA zirlai ti ṭha zualte hnenah Minister-in thuchei a hlan a ni.