Thla 4 chhunga sorkar sum hman tur Vote on Account vbc. 3,277.22 pharh

Finance minister Lalsawta chuan, nimin khan Assembly House-ah April-July, 2015 chhunga Mizoram sorkar sum hman lailâwk tur Vote on Account cheng vbc. 3,277.22 a pharh. Lalsawta chuan, budget session lehah budget puitling pharh theih beisei a nih thu a sawi.

Finance Minister chuan, budget puitling pharh theih a nih loh chhan sawiin, "Planning Commission thlak tura Niti Ayog din a lo nih khan, he ruahmanna thar hnuaia kan kal dan tur rei tak chhung hriat hleih theih a nih loh avang leh 13th Finance Commission leh 14th Finance Commission inthlak lai hunah kan awm avangin 14th Finance Commission report hi February 24, 2015 khan kan hmu thei chauh a, budget session March 17-ah neih tura ruahmanna a lo awm tawh avangin regular budget siam theih a ni ta lo a ni," a ti.
Lalsawta chuan, Finance Commission leh Prime Minister thusawi aṭanga a lan danin, sorkar laipui aṭanga state sorkara sum pek chhuah chungchangah state sorkar kutah mawhphurhna lian zawk pek a ni tawh dawn tih a sawi a, "Chu chuan sum leh pai enkawlnaah awmze nei takin min kal tir thei dawn ta a ni," a ti.
Ruahmanna thar hnuaiah chuan Mizoram sorkarin suma intodelh tura sum hnár hrang hrang a dap ṭhinte leh inrenchemna hrang hrang a kalpui ṭhinte chu nasa lehzuala chhunzawm a ngaih dawn thu sawiin, Lalsawta chuan, "He lam kawnga ke kan pênnaah he House zahawm taka member-te finchhuahna leh thawhpuina ka ngen a ni. In puihna, ṭhahnemngaihna leh remhriatna ka beisei tlat dawn a ni," a ti a; mipuite beisei ang ngeia sorkar chak leh rintlak, state dangte thîk tham hial din tum a nih thu a sawi.
Finance Minister hian Vote on Account a pharh pah hian kum 2014-15 atana sum indaih lohna phuhrûkna tur cheng vbc. 2,154.90, excess expenditure regularise-na tur Supplementary Demand 2010-11 atan cheng vbc. 4.60 leh supplemenatry demand cheng nuai 59.35 a pharh nghal a ni.