Japan sorkarin MFM ṭanpui

Mission Foundation Movement, Mizoram leh Japan sorkar aiawh chuan March 18 khan Embassy of Japan, New Delhi-ah thawhhona tur thuthlung an ziak.

MFM aiawhin Lal­ram­chhuanzela, Coordinator leh Japan sorkar aiawhin Takeshi Yagi, India rama Japan Ambassador-te'n thawhhona hi an ziak a; Embassy of Japan-in Grant Assistance for Grassroots Project (GGP) an pek ṭhin chu MFM hian an dawng dawn a ni.

India ramah GGP dawng tur hi mi pali thlan chhuah an ni a, heng zingah hian MFM hi thlan tel an ni a; Japan sorkar hian dollar 72,307-in MFM hnathawh hi a ṭan­pui ang.

MFM hian Kham­rangah kum 2013 aṭang khan Health Clinic hawngin Health Worker an dah a; he hmunah hian Community Health Clinic din tumin hmachhawp an nei mek a, chumi atan chuan Japan sorkar hnuaia GGP kaltlangin ṭanpuina an dawng dawn a ni.

MFM hian Health Worker Training School leh Pharmacy College an enkawl mek a; hei bakah hian an hnuaia training chhuak tawh mi 337-in India ram hmun hrang hrangah missionary hna an thawk mek a ni.