Taiwan mithiamte'n tui luang ral tur vên tihmakmawhah an ngai

Champhai district-a grape leh kiwi chînna hmun enfiaha rawn kal, Taiwan mithiamte chuan nimin khan Aizawl Press Club-ah thuthar thehdarhtute kâwmin, Mizoramah tui dahkhawlna tur siam leh tui luang ral tur vên chu tihmâkmawh nia an hriat thu an sawi.

Taiwan mithiamte hi Taipei Economic and Cultural Center in India-a second secretary Hsin-Chiang Hsu chuan a kaihhruai a; mi dangte chu - Taiwan ICDF-a project manager Dr Yih-Shiow Chang leh Taiwan Agriculture Research Institute-a assistant horticulturist Ming-Te Lu te an ni.

Hsin-Chiang Hsu chuan, September 2014-a Rajya Sabha MP Ronald Sapa Tlau ngenna angin, Mizorama grape chìnte a thlum zawk theih dan zir a, Taiwan leh Mizoram sorkar thawh dunna tur a awm theih dawn leh dawn loh hre chiang tura lo kal an nih thu a sawi.

Taiwan mithiamte hian March 16, 2015 khan Aizawl an rawn thleng a, March 17-18 khan Champhai district-a grape leh kiwi chìnna hmunte an fang a, huan neitute nen an inkâwm bawk.

Zawhna chhangin Dr Yih-Shiow Chang chuan, Champhai district-ah ram vâwta chìn chi thlai dangte pawh a chîn theih thu leh, grape an chìn chu a thlum ṭhat loh avangin grape chi dang chíng se a duh thu a sawi a, "Mizorama grape chinte rah ṭhat lai ber chu fûr ruahtui tam lai a ni a, tui a pâi tam a, a thlum thei lo a ni," a ti.

Taiwan mithiamte hmuh dan
• Kuthnathawktute an taima.
• Ṭhál laiin tui an nei ṭha lo.
• Grape leh kiwi ten leiṭha mamawh tawk an hmu lo.
• Lei thûr dan tehnaah thlai chìn nan a ṭha tawk.
• Thei zár leh ṭangte an tan danah hmasawn an ngai.
• Sik leh sa danglam zel dan chhinchhiahna ṭha tawk a awm lo.

An rawtnate
• Tui dah khawlna tur leh tui luangral tur venna ṭha siam.
• Thla thum danah ran êk leiṭha pek ziah; kum khatah vawi khat tal fertilizer pek.
• Thei chíngtute thiamna tipung tura zirtirna pek.
• Grape chi dang chîng tura hmalak.
• Taiwan-ah training tur intirh.