Dawrpui leh ACH ram insem dan tur enfiah

UD&PA minister Zodintluanga chuan nimin zing kar khan UD&PA hnuaia Pìpu Tlang, Dawrpuia Multi Level Parking & Community Centre sakna tur ram a en a; Dawrpui khawtlang hruaitute leh Health department hotute nen Dawrpui leh Aizawl Civil Hospital ten ram an insem dan turte an sawiho.

Zodintluanga chuan, October 28, 2011-a lungphùm a lo phùm tawh, Dawrpui Multipurpose Centre tih chu awm tawh mah se, a sakna tur sum a la awm lo niin a sawi a; a sakna tur sum chu Multi Level Parking & Community Centre tih project hming puin hmuh a nih thu a sawi.

Aizawl Civil Hospital ram ṭhin, Dawrpui khawtlang tana sahthlak tawh chu Civil Hospital hnenah eng emaw zat pek let a nih dawn thu a sawi a, "Dawrpui leh Civil Hospital tan mamawh ang hmun a awm ve ve thei dawn a ni," a ti.

Bialtu MLA leh Finance minis­ter Lalsawta chuan, ram chu Land Revenue & Settlement department-in Dawrpui khawtlang leh Aizawl Civil Hospital tan ṭhen dawn a, an tifel dawn hnai tawh niin a sawi a; Multi Level Parking leh Aizawl Civil Hospital lam pro­ject Trauma Centre-te chu sak a hmanhmawhthlak tawh avangin April, 2015 chhunga tihfel ngaite tihfel tum a nih thu a sawi.

Lalsawta chuan, Aizawl Civil Hospital pawimawhzia an hria tih sawiin, "He lai hmunah hian duhkhawp ram a awm lo hrim hrim a, Falkawnah engkim awm turin sorkarin a ruahman a ni," a ti.

Multi Level Parking & Community Centre atana hmalakna chu miin Court-ah titawp turin dil mahse Court-in stay order a pe lo niin a sawi a; sorkar ukilte'n hma la zui tura an ràwn avangin an bawhzui zel niin a sawi bawk.

Thu dawn danin, Dawrpui khawtlang tana Aizawl Civil Hospital ram pek tawhah hian, tuna hmun âwl chuan hnuai zawk chu Civil Hospital tan pek lêt a ni dawn a, chutah chuan Trauma Centre leh ṭul dangte sak tum a ni. A chuan chung zawk, Pìpu Tlang chu Dawrpui khawtlangin an chang zui ang a, Multi Level Parking & Community Centre sak tum a ni a, Dawrpui Multipurpose Centre tih hming vuah a ni ang.

Pìpu Tlang ennaah hian Health minister Lal Thanzara pawh a tel a; Health department, UD&PA leh PWD officer-te an tel bawk.