Thanzara'n RV leimin thenfai dan tur a enfiah

PWD enkawltu minister of state Lal Thanzara chuan nimin khan Rangvamual tawntirha national highway kawngpui chhak lam min ṭhin a enfiah a; kawng­­pui chu a pawimawh em avang­in a tlang reng theih nan sum awm lo chung chung pawha hna thawh zel a ngaih thu a sawi.

Lal Thanzara chuan, NH kawngpui chu Mizorama kawngpui pawi­mawh ber pakhat a nih avangin a tlang reng a ṭul thu a sawi a; kawngpui chu a pawimawh avang­in sum indaih lo chung pawhin hna ṭul ang chu thawh zel sorkarin a duh thu sawiin, lei min thenfai hna thawktu contractor-te chu hna thawktute uluk taka vil reng tur leh an harsatnate a hnenah thlen vat ṭhin turin a chah.

Rangvamual kawnga leimin hi contractor-te'n tun hnai khan PWD National Highway Division-III kaihruaina hnuaiah an thianfai a, lung rem (fûn) mai theiha an buatsaih tawh hnuah March 18-a ruahsur avangin lei min a awm belh a, lei a tinghet lo zual bawka ngaih a ni. Minister-in lei min ṭhin enkawl zel dan tur a en lai pawh hian lung lian tham tak lum a zeuh zeuh reng a ni.

Aizawl DC Dr Franklin Laltinkhuma chuan, kawngpui him zawkna turin lei min belh leh khi tharlámte chu paih leh tum a nih thu sawiin, "Kar leh lamah hna thawh tum a ni a, hna thawh chhungin kawngpui khâr leh a ni ang," a ti.

PWD superintending engineer Henry Lal­muankima sawi danin, Rangvamual lei min thenfaina tur leh lung remna turin cheng nuai 139 ruahman a ni a, mahse lei min thar leh khi tharlám a awm leh tawh avangin sum ruahman zat chu ennawn a ngai turah an ngai. Lei min an thenfai tawhah leivûng cubic meter 50,000 vel an paih a ni.

Rangvamual lei min ennaah hian minister Lal Thanzara hi minister dang pahnih - Zodintluanga leh C Ngunlianchunga, MLA Dr K Beichhua, DM&R secretary PC Lallawmsanga, PWD engineer-te leh geologist-te an tel pawh a ni.