Mizoramah H1N1 vei mi 4 an awm tawh

Nimin khan Health minister Lal Thanzara hoin a pisaah Health department hotute'n Swine Flu H1N1 chungchang an sawiho a; Mizoramah H1N1 vei mi pali an awm tawh tih sawiin, H1N1 chungchangah social media hmanga thuthang dik lo thehdarh lo turin mipuite an ngen.

Health principal director Dr K Ropari chuan, Mizoram aṭangin H1N1 vei nia rinhlelh thisen sample 10 phai lamah thawn a ni tawh a, chung zinga pali chuan H1N1 an vei tawh tih hriatchian a nih thu a sawi a, "Theihtawpin sor­karin Mizo mipuite himna turin hma a la mek a ni," a ti a; Committee on Hospital Response to Emerging & Re-emerging Diseases din a nih tawh thu a sawi.

Meeting-a tarlan dan­in, H1N1 vei hmuh­chhuah tharte zingah, phai lama zin chhuak lote pawh an awm avangin H1N1 chuan eng ang takin nge Mizoram a tuam hriat a harsa rih a ni.

Meeting chuan, mipui­te chu chî-âi lo tur leh social media lama thuthang dik lo thehdarh lo turin an ngen a, "Swine Flu hi hritlang chi khat a ni a, enkawl dam theih a ni. State Referral Hospital-a Swine Flu vanga enkawl mek mi pahnihte pawhin ṭhat lam an pan mek. Swine Flu damdawi pawh a ṭula hman theih turin chah thlen sa diam a ni," an ti.

Meeting-ah hian State Referral Hospital-a Isolation Ward, ICU leh heng hmun atana damlo enkawlna hmanrua leh bungraw pawimawh atan cheng nuai 110 chuang sên a ngai dawn a, Health department pawhin sum hmuh theihna turin nasa takin ruahmanna a siam mek tih tarlan a ni.