Minister-in MMCOA Assembly hmanpui

Mizoram Maxi Cab Owner Association (MMCOA) chuan nimin khan Bawngkawn YMA Hall-ah General Assembly an hmang a, Transport minister John Rotluang­liana'n a hmanpui.

Transport Minister chuan, lirthei khalhtute'n traffic rules leh civic sense an hriat a ngaih thu sawiin, "Population aṭanga chhûtin India-ah lirthei chesual vanga chhiatna thleng tamna ber kan ni a, 60% hi chu zu ruih vang a nih laiin, a dang chu driver lo zawkin a khalh vang te, fimkhur loh vangte a ni. Theihtawpa fimkhur leh ngaihtuahna fím hman a ngai," a ti a; kawng laka lirthei chhia a awma inpuih tawn ṭhin chu chhunzawm zel turin driver-te a chah.

John Rotluang­liana chuan, khualzin zinga 80% chu lirthei khalhtutea innghat an nih thu sawiin, "Khaw tinah maxi cab a service tawh a, eizawnna a nih rualin kan ram leh hnam tan hna thawk kan ni tih hriat reng a pawimawh," a ti.