Zu zawrh phalna licence pakhat titawp Khauh takin zu kan vil: Excise Minister

Excise & Narcotics minister R Lalzirliana chuan, Mizoram Liquor (Prohibition and Control) Act hnuaia zu zawrhte khauh tak leh uluk takin an vil reng nia sawiin, "Dan bawhchhiat vangin vendor licence pakhat cancel a ni tawh," a ti.

R Lalzirliana hian nimin khan thuthar thehdarhtu ṭhenkhat leh IPR department offcial-te hmaah thu sawiin, "Zu zawrh phalna (vendor licence) 63 pek chhuah a ni tawh a, pathum chu cancel a ni tawh. MLPC Act, 2014 hnuaia zu zawrhte hi khauh leh uluk taka vil reng a ni," a ti a; dan bawhchhiate chu hrem an nih ṭhin thu a sawi.

Excise & Narcotics Minister sawi danin, dan bawhchhiat avangin Lallawmzuali, Thenzawl vendor licence chu cancel a ni.

Mizoram Veteran Multi-purpose Society-te chu khawtlang aṭanga harsatna an tawh avanga zu zawrh chhunzawm an tum loh avang leh kum 2014-15 licence fee an pek loh avangin vendor licence cancel sak an ni a; Champhai Grape Growers Society chu an dil angin an vendor licence tihtawpsak a ni thung.

Vendor licence hi Aizawl district-ah 34, Lunglei district-ah panga, Champhai district-ah panga, Kolasib district-ah panga, Serchhip district-ah pariat leh Mamit district-ah pali pek a ni tawh a; chu'ng zinga 47 chuan zu an zuar (function) mek.

Licence hi corporation-ah pariat, society-ah pathum, mimalah 48, MAP-ah pakhat, IR battalion-ah pakhat leh Mizoram Home Guard-ah pakhat pek a ni.

MLPC Act hnuaiah vek hian Licence for Club, Govt. Lod-gings and Hostel hnuaia Aijal Club hnenah zu zawrh phalna pek a ni tawh bawk.

Kum 2015-16 chhung khan MLPC Act hnuaiah hian chhiah Rs. 60,53,37,738 hmuh a ni a, kumin sorkar kum kal mekah April leh May thla chhungin chhiah Rs. 12,07,82,088 hmuh a ni tawh.

R Lalzirliana chuan, July 1, 2016 thlengin MLPC Act hnuaiah liquor company hrang hrang 30 register a ni tawh tih sawiin, "Heng company-a in register-te chauh hian bonded warehouse-ah zu an supply thei. Zu ṭha leh thianghlim chauh zawrh a nih theih nan company registration dil zawng zawng pek an ni lo," a ti a; tuna registration neite chu Food Safety and Stan-dards Authority of India registration nei vek an nih thu a sawi.

Mizorama zu supply tur chu label leh monocarton-te Excise & Narcotics department-in pawmpuina a pek vek an ni tih sawiin Excise Minister chuan, "July 1, 2016 thlenga zu brand chi hrang hrang label register tawh zat chu 208 a ni," a ti.

Zu in phalna permit zat

A hmun Permit

Aizawl district 50,134

Lunglei district 6,195

Saiha district 1,322

Champhai district 3,230

Serchhip district 3,159

Kolasib district 4,253

Mamit district 737

Vairengte 360

Total 69,390