MNF-in VC leh LC an la tam ber

7th September, 2020

September 4, 2020-a local council 23 leh village council pariata inthlan result chu hriat kim theih a ni tawh a, Mizo National Front (MNF)-in LC/VC leh seat an la tam ber.

LC thlanna veng 23-ah hian MNF chuan veng 20-ah hnehna an chang a, Indian National Congress (INC) leh Zoram Peoples' Movement (ZPM)-in LC pakhat ve ve an la thung. Khatla LC-ah party mala sorkarna siam thei an awm lo. LC 23-ah hian seat 157 a awm a; MNF-in seat 103, INC-in seat 36, ZPM-in 16 leh independent candidate-te'n seat pahnih an la a ni.

VC pariata inthlanah chuan MNF-in VC pathum lain, Congress party-in VC pahnih an la a, Melriatah chuan independent-te an tling tam ber. Sàwleng leh Kelsihah chuan party mala sorkarna siam thei an awm lo. VC pariatah hian seat 36 a awm a, MNF-in seat 14, INC-in seat 12, ZPM-in seat paruk an la a; independent candidate-te'n seat pali an la bawk.

Tarlan tawh angin, August 27, 2020 khan local council 59 leh village council 538-ah inthlan a lo ni tawh. LC 59-ah hian MNF-in LC 50-ah hnehna changin, INC-in LC pali-ah leh ZPM-in LC pakhatah hnehna an chang a; independent-te chak berna LC pakhat awmin, LC pathumah party mala sorkarna siam thei an awm lo.

August 27-a inthlanna VC 538 zingah MNF-in VC 324 an la a, INC-in VC 96, ZPM-in VC 38 leh independent-in VC 23 an la a; party mala chak bik awm lohna VC 69 a awm.

August 27 leh September 4-a VC leh LC thlanna result belhkhawmin, VC 558-ah seat 2,464 leh LC 83 ah seat 545 a awm. LC-ah MNF-in seat 365 lain, LC 53-ah an chak a, INC-in seat 120 lain, LC pangaah an chak. ZPM chuan seat 37 lain, LC pahnihah an chak ber a ni.

VC 545 aṭangin MNF pary-in seat 1,376 lain VC 327 an la a, INC-in seat 613 leh VC 98 an la a; ZPM-in seat 268 lain, VC 38-ah an chak ber bawk.

Mizorama district zingah Siaha leh Lawngtlai district-te chu autonomous district council-in a huam vek an ni a; chu'ng district tih loh district dang pakuaah inthlan buatsaih a ni.

Hetih lai hian, Covid-19 leng vangin Ramhlun South LC-ah erawh tun thlengin inthlan buatsaih a la ni lo. September 5, 2020-a chhuak Vanglaini-ah, Chaltlang Lily Veng chu September 4-a inthlang lo anga tarlan a ni a, tihsual palh a ni.