Sorkar leh HPC(D) an inbe hnai

Home minister R Lalzirliana chuan, Mizoram sorkar leh Hmar People Convention (Democrat)-te chu tun aṭanga rei lo têah an inbe dawn tih a sawi a, "Inbe tur hian file-ah chuan tihfel ngaite tihfel vek a ni tawh," a ti.

Home Minister hian nimin khan a pisaah thu sawiin, "Mizo-ramin remna kan neih kum 30-na kan lawm tawh a, HPC(D) demand area-a awmte chuan kum thum chhung vel chiah remna an nei a, an khawngaihthlak hle," a ti a; remna awm lohna hmuna awm chu a tawng ve tawhtu a nih avangin a hrehawm tak zet tih a hriatpui thu a sawi.

HPC(D) demand area a tlawh ṭumin mipuite'n inrem an duh thuin an lo au rual tih sawiin R Lalzirliana chuan, "Mipuite hi ka khawngaih em em a ni. Tun aṭanga rei lo têah remna nei ngei turin khùnkhàn takin HPC(D)-te nen inbiak kan duh," a ti.

Home Minister sawi danin, Mi-zoram sorkar chuan tun aṭanga rei lo têah inbiak tur chungchang hi HPC(D)-te a hriattir ang a, inbiak dan tur engkim peihfel a ni dawn.

Ṭum danga inbiakna ang ni loa thinlung taka inbiak an duh tih sawiin Home Minister chuan, "Anni lam pawh inhawng takin lo kal se kan duh. Kan naute, chipuite leh hnampuite awmna hmar thimpui tih ṭhin kâp êng turin sorkarin ngaihtuah a inhuam em em a ni," a ti.