KHAWTHLIR

Hunthar Veng DPR sawiho

DMR minister C Ngunlianchunga hoin nimin khan a pisaah sorkar department hrang hrang officer-te'n Hunthar Venga lei tlahniam thawm ṭhatna atana detail project report (DPR) chungchang an ngaihtuah a; revised and updated DPR a rang thei ang bera peih tum a nih thu tarlan a ni.

In kâng

Nimin chhun dar 12 vel khan College Veng, Aizawla Lalbiakchunga s/o Duhchhunga (L) in, Assam type a kâng a, bungrua chuh hman lohin a kâng ral. In kan chhan hriat a ni lo a, chhungkaw pathum luah lai niin, thi leh hliam an awm lo.

NLUP sem

AH&Vety dept. chuan nimin khan Siaha I&PR conference hall-ah NLUP hnuaia ar vulh thlangtute hnenah ṭan-puina an sem. NLUP ṭan-puina hi Siaha khawpui chhung leh  Riasika tlangdung a awm mi 164 hnenah Rs. 20,000 ṭheuh ar insakna atan sem a ni.

Heroin man

Excise & Narcotics department leh YMA sub-headquarters, Champhai ṭangkawp chuan nimin khan Champhaia DK Traffic Point bulah heroin can thum leh a neitua puh Ramletthangi, New Champhai an man.

Scheme sawiho

Pradhan Mantri Awas Yojana (PMAY) Housing for All (HFA) 2022 Mission hnuaia district screening committee chu, nimin khan NLUP conference hall-ah an
ṭhukhawm a, scheme hlawhtling taka kalpui dan tur an sawiho.

Kawng enfiah

Parliamentary secretary KS Thanga chuan nimin khan a bial chhung, Hualngohmun leh Samtlang khaw inkalpawhna kawng a tlawh a, kawng dinhmun a enfiah. KS Thanga chuan, kawng hi Lungleng-I, N Lungleng, Samtlang, Hualngohmun, Melriat, Kelsih leh Falkawn khuate tana in-kalpawhna pawimawh tak a nih dawn thu a sawi.