Hindi zirtirtute'n an thawh chhunzawm Theih nan Governor-in tan lak a tum

Governor Lt.Gen. Nirbhay Sharma chuan, centrally sponsored scheme (CSS) hnuaia Hindi zirtirtu mi 1,305-te'n an hna an thawh chhunzawm theih nan theihtawp a chhuah tur thu a sawi.

Mizoram Hindi Prachar Sabha (MHPS) hruaitute leh CSS hnuaia Hindi Teachers's Association (HTA) hruaitute'n nimin khan Governor hi Raj Bhavan-ah an hmu a, CSS hnuaia Hindi zirtirtu mi 1,305-te'n an contract February 2017-a tawp tur chu kum 10 dang an thawh chhunzawm theih nan sorkar laipuia hma laksak turin an ngen.

Larsap chuan, Hindi zirtirtute chungchang chu sorkar laipui lama theihtawp chhuaha hma a lak tur thu sawiin, thlamuang taka awm tur leh road map siam a, a hnena thehlut turin MHPS leh HTA hruaitute a hrilh.

MHPS leh HTA hruaitute hian Mizorama middle school aṭanga Hindi zirna ṭan a ni chu elementary (primary) level aṭanga ṭan a nih theih nan Central-a sum dilsak tur leh MHPS chu tun aia thuam chak a, sum hmuhna turah pawh a ṭul anga sorkar laipuiin a puih an duh thu Governor hnenah an thlen a ni.

Governor hi School Education department-a deputy director (Hindi Wing) C Lalrampana leh Mizoram Hindi Training College principal Dr H Dengkimi ten an ṭawiawm.