SMATEE-a tling zirlaite counselling Neihpui thuai turin sorkar an phût

Mizo Zirlai Pawl chuan thuchhuah siamin, Higher & Technical Education (HTE) department chu State Medical & Technical Entrance Examination (SMATEE)-a tlingte counselling neihpui thuai turin an phût.

MZP chuan, Mizoram Chakma Students Union (MCSU)-te'n Gauhati High Court-ah PIL an theh-lut kal zela High Court-in Mizoram (Selection of Candidates for Higher Technical Courses) Rules, 2016 no. 5 hman theih loh tura a dah vanga zirlaite counseling neih tur tiamchin awm loa sawn hlat a ni chu pawi an tih thu leh an hriatthiam loh thu an tarlang.

MZP chuan, Mizoram (Selection of Candidates for Higher Technical Courses) Rules 2016 siamṭhat a nih dawn laia harsatna siam si lo a, result chhuah hnu leh counseling neih tum mek laia MCSU thil tih dan chu an dem a, "Mizo zirlaite tihbuai tum hrim hrima harsatna an siam hi kan hrethiam lo hle," an ti.

High Court-in SMATEE 2016 a stay lo tih sawiin, MZP chuan, "Counselling neih mek pawh a stay na a awm lo a, Mizoram sorkarin a kaltlangpui theih lohna a awm lo," an ti a; medical college hrang hrangah July 12-15, 2016 chhunga admission tihfel tur a nih avangin counselling neih mek chu a rang thei ang bera chhunzawm turin sorkar an phût.

MZP chuan, "Counselling kaltlangpui a nih loh a, zirlaite'n admission an ti thei lo a nih chuan Mizoram sorkar mawhphurhna a ni ang a, Chakmate vanga Mizo zirlaite'n admission an hmu lo a nih chuan Chakmate chunga eng pawh thleng se MZP-in mawh a phur lo ang," an ti.

MCSU chuan PIL No.49/2016 hmangin Mizoram sorkar chu Gauhati High Court-ah an khing a, High Court chuan June 24, 2016 khan order ti-chhuakin, Mizoram (Selection of Candidates for Higher Technical Courses) Rules 2016-a Rule no. 5 chu hman theih loh turin a dah.

High Court thuchhuak avang hian HTE department chuan June 28, 2016 khan thuchhuah siamin, Mizoram state quota SMATEE 2016 kaltlanga seat pek chhuahna tura June 29, 2016 aṭanga counselling neih tur chu tiam chin awm lo sawn hlat a nih thu a puang a ni.