Ramri-ah boruak thar a awm lo Bungraw phur an la rawn lut lo

Kolasib DC Dr H Lalthlangliana hnen aṭanga Vanglaini thu dawn danin, October 19, Thawhṭanni khan Cachar DC-in a rawn bia a, bungraw phurh luh chungchangah inbiak a duh thu a rawn thlen. Chu chu bawhzuiin Vairengte SDO chu Lailapur-ah a kal a, Cachar official-te nen an inbia a, bungraw phurte vèn (escort) dan ngaihtuah an rêl a ni.

Hetih lai hian, bungraw phur lirthei enkawltute chuan Mizorama luh duh hle tawh mah se, Lailapur mipui zingah lungawi lo an la awm avangin an rawn chhuak thei lo. Assam Rifles bungraw phurte erawh chu venhimna hnuaiah an rawn lut.

Vairengte aṭanga thu dawn danin, niminah chuan ramri-ah mipui pungkhawm an awm tawh rih lo a; chutih rualin, police eng emaw zat an la duty reng thung.

Thinghlun aṭanga Vanglaini thu dawn danin, nimin lamah Assam mi leh sa hmuh tur an awm lo. Mizoram police-te chu Assam mite'n thlai an tihchhiatsak Bendavida huanah an la inkulh reng a ni.

Vanglaini thu dawn danin, Saihapui-V lamah pawh boruak ṭha lo thleng thar a awm lo a, mahse, eng emaw thleng thut thei a nih avangin civil mite pawh inrálring rengin an awm. Saihapui VTF-te duty-na ṭhin, Assam mite'n an tihchhiat tâk chu Assam police-te'n luah zuiin, an awm chilh a; a piah lei bulah Mizoram police-te an awm a ni.

Hetih lai hian, Kanhmun lama Assam leh Mizoram inrìna bul hnaiah Rangamati leh a chhehvel bialtu MLA (opposition MLA) hoin mipui eng emaw zat chuan Mizoram lam panin kawng an zawh a, Mizoram erawh an lut lo. Kawng zawhtute hi Assam police leh CRPF-te'n an zui a, ramria lei kaltlang an phalsak lo.

Ramri bul, Assam lamah kawngzawh a nih avang hian eng emaw a thlen palha inrálring turin Kanhmun mipui an inpunkhawm ve bawk a, mahse, buaina chhuak a awm lo. Assam MLA leh Mizoram police-te an inbiak hnuah mipuite chu an kîr leh a ni.

Hetih lai hian, Assam lamin an ram china kawngpui an dan chu an titawp tawh a, mahse, sumdawng lamin hlauhthawn an la neih avangin Mizoramah bungrua a la rawn lut lo.