Aizawl DC-in quarantine centre atan Rs.2,86,84,600 a dawng tawh
Aizawl DC office chuan Disaster Management & Rehabilitation (DMR) department aṭangin quarantince centre hrang hrang enkawlna leh hmanraw leina atan sum ṭum li an dawng tawh a, an sum dawn belhkhawm chu Rs. 2,86,84,600 a ni. Chutih laiin, tualchhung chanchinbu ṭhenkhatin an tarlan, quarantine centre-a dah bungraw ṭhenkhat a bo nia sawi chu a bo lo niin an tarlang.
Vanglaini-in RTI Act hmangin Aizawl DC pisaah quarantine centre kaihhnawih thilte a dil a; SPIO chuan, quarantine centre atana bungrua an leite chu - mattress, lukham, blanket, bedsheet/pillow case, bucket, no, hmunphiah, floor mob, harpic, disinfection leh a dangte a ni. Bungrua an leite an dahna hmun kimchang zawhna chu, quarantine facility hrang hrangah dah a nih thua chhàn a ni.
Aizawl district-a quarantine facility atana sorkar sum sen tawh zat zawh a ni a; DC pisaa General Establishment Branch-a SPIO-in a chhannate chu tarlan a ni. Quarantine centre atan Mizoram sorkarin bungrua chi hrang hrang a lei a, bungruate chu phai aṭanga rawn haw, quarantine facility-a dah hmasakte chhuahtir an nih hnu lawkah eng emawzat a bo nia sawi a awm a, tualchhung chanchinbu ṭhenkhatin an tarlang.
Quarantine facility-a bungraw ṭhenkhat a bo nia sawi chungchang chu RTI Act hmangin zawh niin, bungraw bo zat leh a bo hun te, khawi quarantine facility-a mi nge tih leh, a rubotute chhui zui an nih leh nih lohte leh thil dangte zawh a ni. SPIO chuan, "Bungraw bo a awm hriat a ni lo," tiin a chháng.