Sorkarin haw hun bituk a khap Khauh zawkin curfew kalpui tum a ni
Health minister Dr R Lalthangliana hoin nimin khan Secretariat conference hall-ah Mizorama Covid-19 dinhmun thlirho a ni. Meeting-ah hian, khawpui aṭanga mahni khuaa haw turte haw hun tur bituk khap a nih thu tarlan a ni a; district khawpuia curfew kalpui mek chu khauh lehzuala kalpui ṭha an ti bawk.
Health Minister chuan, Chief Minister-in Covid-19 dona kawngah nasa takin ṭan a la nia sawiin, "Sum lamah pawh harsatna awm loin a inhawng em em a, a kaihhruaina hnuaiah mi zawng zawng kan ṭan rual avangin tun dinhmun hi kan thleng thei a ni. Tlawmngai taka Covid-19 dona kawnga thawktu volunteer-te lawmman tur peih tawh a ni a, Krismas hma ngeiin pek tum a ni," a ti.
Minister of state Lalruatkima chuan, Mizoram anga sokar, tlawmngai páwl leh kohhran ṭanhona ṭha khawvel hmun dangah a awm a rin loh thu sawiin, "Hei hi Covid-19 donaa kan hlawhtlinna pawimawh ber pakhat a ni," a ti a; thingtlanga chengte'n hripui vanga harsatna an tawh loh nan MGNREGA kaltlangin ni 100 inhlawhna theihtawpa chaka bawhzui a nih thu a sawi.
Meeting-ah hian, hunpui lo thleng turah fimkhur a ṭul lehzual thu sawi lan a ni a, district khawpuia zan dar 8 aṭanga curfew kalpui ṭhin chu khauh lehzuala kalpui a ṭha tih a ni. "Kan chetsual palh chuan hunpui boruak avang hian hri kai darh huk thei kan nih avangin a hma zawng aia khauh leh fimkhur lehzuala sorkar dan siamte kenkawh ni se," an ti.
Meeting-a tarlan danin, November thla tìra inkharkhip puanin a ṭha zawngin awmzia a neiah an ngai a; Covid-19 positive hmuh chhuah tharte zingah state páwn aṭanga rawn lut a tam zawk. Contact tracing-ah harsatna a awm rih lo.
Krismas hunpui hmang tura khawpui aṭanga mahni khaw lama haw turte chu an haw hun bituk loh tur a nih thu tarlan a ni a; hripui laka invênna pawimawh zingah mask vuah chu mipuiin an zâwm ṭha thawkhat a, physical distancing chungchangah erawh chuan tun aia fimkhur lehzual a ṭulah an ngai.
Ṭhutkhawmah hian chief secretary Lalnunmawia Chuaungo, Health secretary H Lalengmawia, Home secretary Lalbiaksangi, Indian Medical Association, Mizoram Kohhran Hruaitute Committee leh Joint NGO Coordination Committee aiawhte an tel a ni.
Ṭhutkhawma tarlan dangte
• Dawr leh sumdawnna hmuna SOP zâwm lote chungah khauh taka action lâk tur.
• Khawvel hmun danga zirchianna tun hnaia neihah, chhungkaw inhmuh khawmna aṭanga hri inkài darh an tam. Mizoramah pawh hetiang chi hi a awm nual tawh.
• Hunpui vuakvetah chhungkaw pakhata cheng ho ni lo chu chhungkhat laina chaw eikhawm leh inhmuhkhawm buatsaih loh ni se.
• Sorkar dan bawhchhe zawnga ṭhian leh páwl inhmuh khawm buatsaih loh ni se.