JEE & NEET exam hun sawn an duh Hma la turin Chief Minister an ngen
Mizoram aṭanga National Eligibility cum Entrance Test (NEET) leh Joint Entrance Examination (JEE) exam tumte leh MZP chuan, kumina NEET/JEE exam hun chu sawn a nih theih nan hma la turin chief minister Zoramthanga an ngen.
NEET/JEE exam hun chungchangah hian MZP chuan August 29, Inrinni khan Chief Minister hnenah lehkha an thehlut a, "India ram pum huapin Mizo zirlaite'n harsatna an tawk mek niin kan hria a, pawi kan ti hle... Ruahmanna ṭha zawk nen lo chuan exam hi kalpui chiah kan ngai lo," an ti a; CM chu zirlaite himna ngaihtuah a, Mizo zirlaite harsatna chu HRD Minister hnenah thlen tur leh exam hun sawn a nih theihna atana hma la turin an ngen a ni.
Exam tur zirlaite chuan, NEET/JEE chu Mizoram aṭanga exam tum zirlai sang hnih chuang an awm thu te, Aizawl exam centre chang lo, state danga centre chang eng emaw zat an awm thu an sawi a, "State páwna exam centre changte tan state páwna kal ngam chi a ni rih lo. Aizawl centre changte tan pawh khaw hrang hrang aṭangin Aizawl pan khawm a ngai dawn a, tunlaiah mikhual neih a remchan loh avangin thlenna turah harsatna nei tam tak an awm a ni," an ti.
Zirlaite chuan, India rama state 13-in NEET/JEE exam hun chu sawn turin sorkar laipuiah an ngen tawh tih sawiin, Mizoram sorkar hotute pawhin zirlaite harsatna hriaa hma laksak turin an ngen a; exam tum zirlai tam tak chu sum leh thâ tam tak sénga kum khat leh a aia tamte inbuatsaih tawh a nih thu an sawi bawk.
MZP-in CM hnena an hrilhte
JEE & NEET exam centre hi Mizorama Aizawlah chiah a awm a, zirlai exam turte khaw hrang hrang aṭanga kal khawm tur an nih avang leh khaw tam takah maxicab service a awm loh avangin transportation-ah harsatna an tawk a; thingtlang aṭanga exam turte'n thlenna tur an nei lo.
Exam turte awmna khua/veng eng emaw zat lockdown a ni a, zirlai eng emaw zat quarantine mek an awm bawk.
JEE hi September 1-6, 2020 chhunga exam tur a ni a, exam tum mi 800 vel an awm. NEET hi September 13-ah exam tur a ni a, exam tur zirlai 1,300 vel an awm. Zirlaite'n hri darh palh an hlau a, hri darh palh thilah quarantine ngai se, after care ruahman sa a awm lo.
JEE & NEET exam kawp an awm ṭhin a, JEE exam-ah buaina an tawh palh chuan NEET exam-na chance an neih tawh dawn loh avangin, exam kawl turte tan harsatna a thlen.
National Testing Agency (NTA) guidelines chhuah angin zirlai exam turte'n Covid free certificate neih tel a ngaih avangin zirlaite harsatna a thlen.
Mizoram aṭangin zirlai eng emaw zat Mizoram pawna exam centre (Maharashtra, Jharkhand, Shillong, Guwahati, etc.) nei an awm a; Mizoram páwn aṭanga Aizawl exam centre chang an awm bakah, state páwna tangkhang Mizo zirlaite an awm avangin an mangang hle.