Medical seat pek hun tur la hre lo YMA-in inhnûkdâwk turin MCSU an phût

Higher & Technical Education (HTE) department chuan academic session 2016-17 aṭanga Mizoram sorkar quota-a medical course hrang hrang zir turte seat chan tur siam fel theih hun tur an la hre thei lo. Hetih lai hian, Central YMA chuan Chakma zirlai pawlte chu Gauhati High Court-a an PIL thehluh hnûkkîr turin an phût.

Tarlan tawh angin, MCSU chuan PIL No.49/2016 hmangin Mizoram sorkar chu Gauhati High Court-ah an khing a, High Court chuan June 24, 2016 khan order tichhuakin, Mizoram (Selection of Candidates for Higher Technical Courses) Rules 2016-a Rule no. 5 chu hman theih loh turin a dah.

High Court thuchhuak avang hian HTE department chuan June 28, 2016 khan thuchhuah siamin, Mizoram state quota SMATEE 2016 kaltlanga seat pek chhuahna tura June 29, 2016 aṭanga counselling neih tur chu tiam chin awm lo sawn hlat a nih thu a puang a ni.

Vanglaini palai zawhna chhangin HTE secretary K Lal Nghinglova chuan, State Medical & Technical Entrance Examination (SMATEE)-a tlingte an luhna tur institution siam remna, counseling chu an tih theih hun tur a sawi thei lo a, "A rang thei ang bera tih kan duh. Tunah hian Law & Judicial department-ah file a kal mek," a ti a; tun kara an tih hman dawn leh dawn loh pawh a la sawi theih loh tih a sawi.

SMATEE 2016 leh MCSU-te'n Gauhati High Court-a petition an thehluh chungchangah Central YMA chuan thuchhuah an siam a, "MCSU-te'n Gauhati High Court-a PIL an thehluh vanga harsatna a awm leh zirlaite'n counselling an nei chhunzawm thei lo hi ṭha kan ti lo a, MCSU-te hi a rang thei ang bera inhnûkdâwk turin kan phût a ni," an ti a; hemi chungchanga MZP hmalakna chu CYMA-in an thlawp tlat thu an tarlang.

MZP chuan, Higher & Technical Education (HTE) department chu State Medical & Technical Entrance Examination (SMATEE)-a tlingte counselling neihpui thuai turin an phût a; MCSU-te PIL thehluh leh High Court thuchhuak vanga Mizo zirlaite admission tihna turah an tlai chuan, Chakmate chungah eng pawh thleng se, MZP mawh a nih loh tur thu an tarlang tawh a ni.

SMATEE 2016-ah hian Medical group-ah chuan pakhatna chu Lalropuia s/o J Rozara a ni a, Engineering group-a pakhatna chu Lalremsanga s/o Lalrohlua a ni. Medical group-ah hian Category I (Mizorama awm nghet Mizo)-ah zirlai 1,337 an tling a, Category II (Mizorama awm nghet Mizo ni lote)-ah zirlai 34 awmin, Category-III (Mizorama awm nghet lo hnam dang)-ah zirlai pakhat an awm.

Engineering group-ah chuan Category I-ah zirlai 209 an tling a, Category II-ah zirlai 21 leh Category III-ah zirlai pakhat an tling bawk.

Medical group-ah hian Category II-a pakhatna leh Category I-a 93-na te mart hmuh zat a intluk a, Category III-a tling awmchhunin Category I-a 38-na aiin mark a hmu sang zawk. Engineering group-ah chuan Caterogy I-a 29-na aiin Category II-a pakhatnain mark a hmu zang zawk a; Category III-a tling awmchhunin Category I-a pasarihna aiin mark a hmu sang zawk a ni.