Kawng chhia avangin Mamit dist.-ah harsatna

National Highway 44-A, Lengpui-Mamit-Tuidam-Langkaih kawng, km. 103.614-a thui laih hna chu contractor-in a thawh muan avangin Mamit district-in kawng hrang hrangin harsatna an tawk nia thu dawn a ni.

Mamit aṭanga thu dawn danin, kawng siamna tur hian cheng vbc. 544.75 ruahman a ni a, March 2, 2011-ah agreement ziah a ni. December 11, 2011-ah contractor turin Gyatri Projects Ltd., Hyderabad thlan a ni a, mahse, anni hian sub-contractor Ratna a pe chhawng leh a ni.

Kawng siamna tura sum ruahman chu ennawn niin, January 2, 2015-ah cheng vbc. 713.5-ah tihsan a ni a; kawngpui, double lane-a laih tur hi April 17, 2014-ah zawh tura tih a nih laiin, tun thlengin an la zo lo a, July 17, 2017 thleng hun pawhsei a ni.

Thu dawn danin, kawng-pui siam hna hi 38% vel chiah zawh a la ni a, a hun taka kawng zawh a nih dawn loh bakah, kawng laih vangin kawng a chhe rih hle a, fur lai a nih avangin a nâl hle. Kawng ṭhat lai chuan Mamit leh Aizawl inkar chu darkar thum chhung vel tlan a ni a, tunah erawh chuan darkar sarih vel tlan a ngai.

Kawng laih vang hian kawng awm sa chei ṭhatna turin cheng nuai 100 dah a ni a, hmun ṭhenkhatah kawngpui thawm ṭhat ni mah se, hna an thawh chak loh avangin kawng awm sa pawh a chhe rih hle.

Kawng a chhiat em avang hian Mamit district mipuite'n harsatna an tawk nasa hle niin thudawnna chuan a sawi a, "Khawthlangah khualzin leh bungrua phur motor tam tak an tlan ṭha duh tawh lo," an ti.