KHAWTHLIR

Nuai 1-in tanpui

Rotuaki Feeds, Kulikawn chuan State Referral Hospital-a damlo hman tur oxygen khawl lei nan Rs. 1,00,000 an pe a; State Referral Hospital hotute chuan lawmthu an sawi.

Thisen pe

Samtlang Branch KṬP chuan an branch diamond jubilee lawm nan nimin khan an Kohhran Centenary Hall-ah blood donation camp an huaihawt a, Synod Hospital tan mipa 24 leh hmei-chhia palite'n thisen unit 28 an pe.

Id-ul-Fitr

Nimina Mosolman-te ni pawimawh, Id-ul-Fitr chu sorkar laipui chuan vawiinah a sawn a; hei vang hian GAD department pawhin hriattirna tichhuakin, vawiin July 7 hi Id-ul-Fitr a nih tak avangin Mizoram sorkar chawlh a nih thu a puang.

Zoonosis Day

AH&Vety department leh Mizoram State Veterinary Council
ṭangkawp chuan nimin khan ran aṭanga natna inkai chhâwn theih venna ni, World Zoonosis Day an hmang. Day pual hian State Veterinary Dispensary, Lawngtlaiah a thlawnin ui a hri venna (anti-rabies vaccine) pek a ni.

HNA dintu thi

Hmar National Army (HNA) dintu Thansanga chu July 5, 2016 zing dar 1 vel khan Churachanpur-a Sielmat Hmarvenga an inah kah hlum a ni. Lamka YMA president Lalzawmliana sawi danin, Thansanga kap hlumtute leh an kah chhan hriat a ni lo a, a kal hlumtua inchhál an awm rih lo. Thansanga hi a ruang endik a nih hnuah nimin khan vui a ni.

Kawng hawng

Maubawk High School Veng Welfare Committee-in metre 300 vela sei kawng an siam chu nimin zing khan minister R Lalzirliana'n a hawng. Kawng hawnaah hian minister bakah, parliamentary secretary KS Thanga, bialtu MLA Vanlalzawma leh bialtu councillor Zodingpuii ten thu an sawi. Kawng hi RCC-a siam a nin a, a siam nan Rs. 1,05,064 hman a ni.