MNF party-in corruption chhui tura CBI ko lut duh loah sorkar an puh

MNF party chuan thuchhuah siamin, Mizo-ram inthlan dawna Cong-ress party-in tih tur an intiam zingah cor-ruption leh mi ṭhen-khat thihna chhui turin Central Bureau of Investigation (CBI) koh luh intiam laiin, kum riat dáwn an sorkar tawh hnuah pawh CBI an la ko lut lo niin an tarlang.

Rangkachak tlang 52, cheng nuai 1,400 vel hû tawlhrûk leh suam thubuai Special Investigation Team (SIT)-te'n chhui ngaihna an hriat loh vanga sorkarin CBI kuta hlan a tum chungchangah MNF chuan, "Thuneitu sang
ṭhenkhat leh smuggler-te inkarah hnungzáng inhiahsak tawnna a awm em tih enfiah a ṭul hlein kan hria," an ti.

MNF chuan, Mizoram police-a SIT-te'n hleih neia rangkachak tawlhruk suam thubuai an chhui em tih en chian ṭul an tih thu sawiin, "Rangkachak phurtute ngei man an ni ve lo leh FIR pakhat pawm a, FIR dang pawm loh leh register duh loh hi a chhan leh vâng mipui lungawina tâwka an sawifiah loh chuan thubuai kalpui dan leh thil chhui zui dan rinhlelhawm takah mipuiin an ngai zui dawn a ni," an ti. MNF-te'n Mizoram police-te ram dang police aiin an dah hniam ngai lo a, mahse, rangkachak chhuina kawngah mipui beisei an phâk lo niin an sawi.

MNF chuan, Mizoram sorkarin rangkachak suam thubuai chhui tura CBI an hmang duh a nih chuan, Mizoram State Lottery-a Mizoram sorkarin cheng vaibelchhe tam tak sum a hlohna te, Mizo Carbon Products-in dik lo taka Central Transport Subsidy (CTS) cheng vaibelchhe tam tak an lak dan te, Sunshine Overseas-a minister Lal Thanzara'n chanvo 21% a neih dante chu CBI chhuitir ve turin Mizoram sorkar an phût.

NLUP-ah cheng vbc. 2800 chuang holam takin a rîral nia sawiin, MNF chuan, CBI chhuitir an duh thu an sawi a, "NLUP scandal nasa lutuk, motor lei zat sawi dan inang lo te, NLUP sum bank-a dah pun dan inmil lo lutukte hi CBI chhui chian atan kan present duh," an ti.