Covid-19: Mizoram dinhmun Vei hmuh tawh zat mi 1,008

August 28, 2020 khan Mizorama Covid-19 hripui vei hmuh chhuah a awm lo a, August 29, Inrinni khan mi panga hmuh chhuah a ni thung. Inrinni vêk khan hripui vei dam tawh mi 70 chhuahtir niin, ni khata chhuahtir an tam ber ṭum a ni a, nimin khan mi panga chhuahtir leh a ni bawk. Mizorama Covid-19 kai hmuh tawh zat chu mi 1,008 an ni.

August 29-a Covid-19 vei hmuh chhuahte chu ZMC-a hmuh chhuahte an ni a, harsat­na nei rih lo (symptom nei lo) vek an ni. An zinga pakhat chu Aizawl Venglai nula kum 26, Mizoram chhunga kái chhawng a ni. Nimin khan Vairengte checkbate-ah RAT hmangin hripui vei mi pathum hmuh chhuah leh a ni a, hei erawh hi chu sorkar record-ah a la lang lo.

August 29, Inrinnia ZMC Covid-19 laboratory-a mi 831 endik zinga hripui vei hmuh chhuahte chu Aizawl district mi pakhat leh Kolasib district leh Mamit district mi pahnih ve ve an ni. Covid-19 vei Kolasib district mite chu mipa kum 19 mi leh hmeichhia kum 31 mi, Delhi leh Manipur aṭanga rawn lut an ni a, Mamit district-a mite chu râwlthar kum 15 leh 16 mi, Uttar Pradesh aṭanga rawn lutte an ni thung. State pawn aṭanga rawn hawte hi qua­rantine facility-a awm mek vek an nih thu sorkar thuchhuahin a tarlang.

Hetih lai hian, Lunglei Civil Hospital (LCH) laboratory-a TrueNAT-PCR hmanga mi 15-te leh Rapid Antigen Test hmanga Aizawl, Lunglei, Kolasib leh Hnahthial district-a mi 653-te swab sample endikte chuan hripui an vei lo tih hmuh a ni thung. August 28, Zirtawpni khan ZMC-ah mi 156 leh LCH-ah mi 41-te swab sample endik a nih bakah, RAT hmangin mi 174-te swab sample endik a ni a; Covid-19 vei hmuh chhuah an awm lo bawk.

Nimin khan zing dar 5 leh tlai dar 5 inkarah RAT hmangin Vairengteah hnam dang 275-te sample endik a ni a, Covid-19 vei mi pathum hmuh chhuah a ni. Vairengteah hian nimin lai dar 5 thleng khan mi 10,120 (Mizo 540 leh hnam dang 9,580) endik a ni tawh a, hripui vei mi 101 hmuh chhuah tawh niin, hnam dang 99 leh Mizo pahnih an ni. August 29, Inrinni khan Covid-19 vei mi 70 chhuahtir an ni. State Referral Hospital (ZMC) aṭangin mi pathum - mipa pahnih, hmeichhia pakhat chhuahtir an ni a; an zingah hian ICU-a enkawl ṭhin, SRH-ZMC nurse pakhat a tel.

Inrinni chawhma  dar 11-ah Champhaia Dedicated Covid Health Centre (District Hospital) aṭangin mipa leh hmeichhia pakhat ve ve chhuahtir an ni a, Champhai district-ah hian hripui vei hmuh tawh mi 16 zinga mi 15 an chhuak tawh. Serchhipa Covid care Centre (CCC) - Nursing School aṭangin BSF mi leh sa 38 leh Lungleia CCC - SIRD, Pukpui aṭangin BSF sipai pasarih chhuahtir an ni a; tlaiah Aizawla CCC - Tribal Art Centre, Tanhril aṭangin civil mi pahnih chhuahtir niin, Ayush Hospital, Thenzawl CCC aṭangin BSF sipai 18 chhuahtir an ni bawk. Serchhip leh Thenzawl aṭanga chhuahtirte hi Aizawl district case ve ve a ni. Nimin khan Serchhip DCHC aṭangin mipa pathum leh SRH-ZMC aṭangin mipa pahnih chhuahtir leh an ni bawk.