Laldenga thih champha pualin hun hmang

Nimin July 7 kha MNF founder president Laldenga thih champha a ni a; he ni pual hian MNF-te chuan nimin zing khan Treasury Square-a Laldenga thlânah hriatrengna inkhawm an buatsaih a, hruaitute'n zahna pangpar an dah.

Inkhawm hi MNF vice pre-si-dent Dr R Lalthangliana'n a kaihruai a, MNF senior vice president Tawnluia leh Laldenga nupui Lalbiakdikite'n thu an sawi.

Tawnluia chuan, Laldenga chuan kum 34 mi chauh a nih laiin MNF a din tih sawiin, "A ngaihtuahna zawng zawng ram tan a pe a. Kan ram tan kan rilru leh kan chakna zawng zawng kan pe tih he khawvel hian hre mawlh rawh se," a ti.

Lalbiakdiki chuan, MNF leh a kaihhruai hnam sipaite’n silai kengin zalenna sual tawh lo mah se, zalenna hmu tura beihna thinlung ṭhangtharte rilruah a la kal reng nia sawiin, "Kan pa leh hnam tana martarte’n kawng an lo sahkuak tawhah Zofate zalenna leh rorelna pakhat hnuaia awm hi ka thlakhlelh ber a ni," a ti a; MNF chu Pathian hming lam chunga din a nih vangin, tlu mah se, a tho leh ṭhin tih a sawi.

Laldenga hi July 11, 1927-ah Lunglei Pukpui khuaah a piang a, kum 1944-ah British Indian Army a zawm a, kum 1959-ah Mizo National Famine Front dinin, chu pawl chu October 22, 1961-ah Mizo Natinal Front (MNF) tiin an thlak a ni.

Kum 1986 khan Mizoram sorkar lailawk (interim)-ah Chief Minister niin, kum 1987-a Mizoram state Assembly inthlan hmasa berah Sateek leh Aizawl North-II bial
aṭanga thlan tlin a ni a, state nih hnua Chief Minister hmasa ber a ni.

Kum 1990-ah Memorial Sloan Ketering Cancer Centre, USA-ah thla thum enkawl a nih hnuin Mizoram pana an haw kawngah, Ashford Hospital, London-ah July 7, 1990, India sanaa tlai dar 2:30-ah a thi.

A ruang chu July 11, 1990 tlai dar 4:30-ah Tuirial Airfield-ah helicopter-in phurh thlen a ni a, July 13-ah vui niin, Mizote zinga state funeral-a vui awm chhun a la ni.