KHAWTHLIR

M.Th. result

Senate of Serampore chuan July 6, 2016 khan Master of Theology (M.Th.) result a tichhuak a, Aizawl Theological College (ATC) aṭangin mi 20 an pass. Mi 20 zinga pasarih chu A- ah an pass a, mi 10 chu B+ ah pass-in, B ah pathum an pass a ni.

Thisen pe

225 Battalion Central Reserve Police Force (CRPF), Aizawl chuan nimin khan an camp-ah blood donation camp an huaihawt a, Aizawl Civil Hospital tan thisen 76 an pe.

Hall hawng

Tawipui North-I khuaa community hall sak thar chu Nilaini khan Lunglei HPC vice chairman S Laldingliana'n a hawng. S Laldingliana hian hall thar lawmpuina atan badminton leh table tennis hmanruate a hlân nghal a ni.

DC-in tlawh

Champhai District Level Monitoring Committee-in mipui cheng zat hisapa BPL awm tamna khuate a tahtawla tlawha BPL tam chhante leh mipuite harsatna zirchiang tura thutlukna a siam bawhzuiin, Champhai DC Vanlalngaihsaka chuan tun hnai khan Chhawrtui, Puilo leh Kawlkulh a tlawh a, BPL tam chhan a enfiah.

Lungphùm phúm

225 Battalion CRPF-te chuan tun hnai khan Luangmual, Aizawla Gan Sabra Society tui lakna tur an siamsak tur lungphùm an phúm. CRPF-te hian Gan Sabra-te'n tui in tur an lak luhna atan metre 450-a sei pipe an dahsak dawn a ni.

IPR tihdikna

IPR department chuan thuchhuah siamin, June 30, 2016-a Lawngtlaia Remna Ni lawmna chungchang an report-ah, 'He hunah hian Lawngtlaia sorkar department hrang hrang officer leh staff te, NGO leh political party aiawh te, chanchinbumi leh sikul naupangte bakah, remna ngaihlutu mi eng emaw zat an tel,' tih chu, 'He hunah hian Lawngtlaia sorkar department hrang hrang officer leh staff te, chanchinbumi leh sikul naupangte bakah, remna ngaihlutu mi eng emaw zat an tel' tih tur a nih thu an tarlang.