Serchhip MJA-in District Jail hawn thuai duh

MJA Serchhip district member-te 10-te chuan nimin khan an president C Lalhminghlua hoin Chhiahtlanga Serchhip District Jail tur sak an enfiah a; jail chu hman theiha siam thuai tur leh hawng thuai turin sorkar an ngen.

Serchhip MJA-te'n Serchhip District Jail an tlawhnaah hian jail superintendent C Lalbiaktluanga leh a thawhpuite'n an lo dawngsawng a; jail ward hrang hrang an fang kual a, thawktute'n hrilhfiah ngaite an hrilhfiah a ni.

Serchhip MJA-te chuan, Serchhip District Jail building chu a taka hman theih tura peih thawkhat nia an hriat thu sawiin, "Jail enkawltu turte pawh a hmunah dah tawh an ni a, tuna an hawn theih loh chhan ber nia lang chu - jail táng, duty-na post palia vengtu, arm guard duty tur la lak loh a ni berin a lang," an ti.

Serchhip District Jail-ah hian superintendent hoin thawktu 18 an awm a; chungte chu - jailer pakhat, head warder pahnih, warder pariat, female warder pakhat, IVth grade pathum, male nurse pakhat leh MR warder pakhat an ni. Jail hi mipa 116 leh hmeichhia 38, a vain mi 154 tàn theihna tura sak a ni.

District Jail hi kum 2003-a sak ṭan niin, December 2014-ah Superintendent a awm
ṭan a, thawktu dangte chu March 2015-ah an awm ṭan. Quarters 20 a awm a, pahnih tih loh chu luah vek tawh a ni a; armed barrack pathum leh arm quarters pakhat a awm bawk.

Serchhip MJA-te chuan, Jail panna kawng, Chhiahtlang aṭanga Sialhau leh Lungpho panna kawng ni bawk chu blacktop tawh a ni chungin tun dihmunah hmun hnih 2/1 chu siamṭhat ngaiin a chhe leh tawh niin an sawi a; "Tui leh êngah harsatna an neih tawh loh thu an sawi a, building ṭhenkhat thawm ṭhat ngai nia langte pawh Jail hi hman theiha hawn a nih chuan siamṭhat mai theih an beisei," an ti.