Covid-19 vei hmuh thar 27 zingah Mizorama kái 24, symptom nei 21

October 19, Thawh­ṭannia Mizorama Covid-19 vei mi 27 hmuh chhuah zingah Mizoram chhunga kai chhâwng 24 an awm. Mizorama kái zingah kài chhan hriat loh mi 21 an awm a; Covid-19 vanga taksaa harsatna nei (symptom lang) mi 21 an awm bawk.

Mizoram chhunga hripui kai hmuh tharte chu ZMC-a hmuh chhuah mi pathum leh Rapid Antigen Test (RAT) hmanga hmuh chhuah mi 21 an ni.

RAT hmanga hmuh zingah Zarkawt veng mi 13 (mipa 8 leh hmeichhia 5) an tel a, a naupang ber chu mipa naupang kum 7 mi a a ni. An vaiin Covid-19 symptom an neih vanga swab test an ni a, an kai chhan hriat a ni lo. Zarkawt LTF tarlan danin, an zinga mi paruk chu chhungkaw pakhata mi - KM Lalrindika leh a nupui leh an fate an ni a; chhungkaw dangah pafaa kai an awm bawk.

Zarkawt LTF chuan, an veng mi, Covid-19 veite'n an kài chhàwn theih àwmte chhui zui nghal a nih thu sawiin, veng mipuite chu inlèn pawh lo turin an hriattir a; an venga wholesale dawrte pawh thu leh awm hma chu khâr rih tur a ni tih an tarlang.

October 19, Thawhṭanni khan Mizoramah Covid-19 vei mi 27 hmuh chhuah a ni a, an zinga 24 chu Mizoram chhunga kái chhâwng niin, Mizorama kái zingah kài chhan hriat loh mi 21 an awm. Nimin khan hripui laka fihlim tawh mi 12 chhuahtir an ni thung.

Thawhṭannia hmun hrang hranga Covid-19 positive hmuh chhuah dan chu - ZMC laboratory-ah  mi pathum, Champhai leh Kolasib district-a TrueNAT-PCR hmangin mi pahnih leh, Rapid Antigen Test (RAT) hmangin Aizawl, Serchhip, Lawngtlai leh Mamitah mi 22 a ni.

Nimin khan mi 12 chhuahtir an ni a; SRH-ZMC aṭangin mi paruk, Kolasib CCC aṭangin pathum, Kolasib DCHC, Chhiahtlang CCC leh Lawngtlai CCC aṭangin pakhat ṭheuh an chhuak a ni.

Mizorama Covid-19 positive hmuh chhuah tawh mi 2,280-te chu mipa 1,856 leh hmeichhia 424 an ni. An zinga mi 2,163 (94.87%) chu chhuahtir an ni tawh a, enkawl mek mi 117 (5.13%) an awm. La chhuak lo zingah hian hripui vei tawh lo an awm nual bawk.

October 19-a ZMC-a Covid-19 vei hmuh chhuahte chu Aizawl khawpui chhunga mi vek, mipa pahnih leh hmeichhia pakhat an ni. Bethlehem Venga mipa kum 38 mi, home quarantine-a awm mek te, Chanmari West-a hmeichhia kum 19 mi, home quarantine mek leh, Dawrpui venga mipa kum 62 mi-te an ni a; Dawrpuia mi hi Covid-19 symptom a neih vanga State Referral Hospital-a awm sa a ni.

TrueNAT-PCR hmanga hripui vei hmuh chhuahte chu - Champhaiah Bethel Venga khawsa mek mipa kum 24, Guwahati aṭanga rawn lut leh, Kolasib-ah mipa kum 27 mi, Counter Insurgency & Jungle Warfare School, CIJWS-a awm an ni a; an pahnihin symptom an nei lo.

RAT hmanga Covid-19 positive hmuh chhuah mi 22 zinga 17 chu khawpui chhung mi vek, mipa 11 leh hmeichhia paruk an ni a, Aizawl tualchhunga kai vek an ni. Serchhip leh Lawngtlai district mi pahnih ve vete pawh Mizoram chhunga kái an ni a; Mamit district-a hmuh chhuah pakhat erawh chu Tripura aṭanga rawn lut, Kanhmun screening point-a endik niin mipa kum 44, symptom nei lo a ni.

RAT hmanga Aizawla hmuh chhuah zingah Zarkawt veng mi 13 (mipa pariat leh hmeichhia panga) an tel a, a naupang ber mipa kum 7 leh a upa ber kum 53 a ni. Chaltlanga mipa kum 18 mi, Chanmari-a mipa kum 13 mi, Chhinga Venga mipa kum 20 mi leh, Dawrpui venga hmeichhia kum 35 mite hmuh chhuah an ni bawk.

Serchhipa RAT hmanga hmuh chhuah mi pahnihte chanchin chu nimina chhuak Vanglaini-ah tarlan a ni tawh a; Lawngtlaia hmuh chhuah mi pahnihte chu mipa kum 15 mi leh hmeichhia kum 20 mi an ni.

October 19, Thawhṭanni khan swab sample ZMC-ah 546, TrueNAT-PCR hmangin district pariatah 103 leh district tinah ( district 11)-ah 588 endik a ni a; a vaiin sample 1,237 a ni.