COVID-19: Mizoram dinhmun Hripui vei mi 5 hmuh belh a ni

December 16, Nilaini khan Mizoramah Covid-19 vei mi panga hmuh chhuah an ni a, Mizoram chhunga kái vek an ni. Hripui laka fihlim tawh mi 15 chu nimin khan chhuahtir an ni thung.

Covid-19 vei Nilainia hmuh chhuahte chu mipa pahnih leh hmeichhia pathum an ni a, Rapid Antigen Test (RAT) hmanga Aizawl, Lunglei leh Lawngtlaia swab sample 530 endik aṭanga hmuh chhuah an ni. ZMC laboratory-a Aizawl district-a mi 235 leh TrueNAT-PCR hmanga district pakuaa mi 162 endik zingah hripui vei hmuh a ni lo.

Nimin khan Covid-19 laka fihlim tawh mi 15 chu enkawlna hmun aṭangin chhuahtir an ni a; Lawngtlaiah mi pariat, Serchhip district-ah panga, Aizawl leh Khawzawlah mi pakhat ve ve an chhuak.

Mizorama Covid-19 positive mi 4,085 hmuh chhuah tawhte chu mipa 3,005 leh hmeichhia 1,080 an ni. Nimin tlai dar 5 thleng khan mi 3,922 (96.01%) chhuahtir an ni tawh a, mi pasarih (0.17%) thi tawhin, enkawl mek mi 156 (3.82%) an awm.Mizorama Covid-19 positive hmuh chhuah tawh mi 4,080 zinga mi 1,939 chu Mizoram chhunga kái an ni a, mi 2,146 chu state páwn aṭanga rawn lût an ni.

December 16-ah swab sample 927 endik a ni a, chu'ng zinga Covid-19 vei mi panga hmuh chhuah rate chu 0.54% a ni. Hri vei hmuh tharte chu Mizoram chhunga kái vek niin, an zingah kài ṭanna hriat loh pahnih an awm a; natna (Covid-19 symptom) lang chhuak mi pahnih an awm bawk.

Mizoramah swab sample 1,68,202 endik tawh aṭangin Covid-19 positive mi 4,085 hmuh chhuah a ni tawh a, chu chu 2.42% a ni. Mizoram páwn - Kolkata, Guwahati leh Silchar-ahte swab sample 58 endik a ni a, chu'ng aṭang chuan hripui vei mi pakhat, Mizorama hripui kái hmasa ber hmuh a ni.

ZMC Covid-19 Laboratory-ah April 7, 2020 aṭangin sample endik ṭan a ni a, December 16, Nilaini thleng khan sample 86,443 endik tawh niin, Covid-19 positive 2,525 (2.92) hmuh chhuah a ni tawh.

TrueNat-PCR hmanga sample 13,619 endik tawh aṭangin Covid-19 vei mi 600 (4.41%) hmuh chhuah a ni tawh a; RAT hmanga sample 68,082 endik aṭangin hripui vei mi 959 (1.45%) hmuh chhuah a ni tawh bawk.

Covid-19 vei hmuh tharte:

Tuikual North - 1: Hmeichhia kum 58, Aizawla private hospital pakhata hmuh chhuah, symptom nei, hri kàina hriat loh.

Lunglei Salem Veng - 1: Mipa kum 40, hri kaina hriat loh, symptom nei lo.

Lawngtlai Chandmary - 1: Mipa kum 28, hri kài ṭanna hriat, symptom nei lo.

Lawngtlai College Veng - 1: Hmeichhia kum 11, hri kài ṭanna hriat, symptom nei.

Lawngtlai Electric Veng - 1: Hmeichhia kum 21, hri kài ṭanna hriat, symptom nei lo.