Mizorama VC leh LC inthlan result kimchang hriat a ni ta

August 27, 2020-a village council leh local council thlana result kimchang hriat a ni ta a, state sorkara rorel lai Mizo National Front (MNF) party an chak ber. MNF hian VC 324 leh LC 50 an la.

Inthlan hi autonomous district council-in a huam Lawngtlai leh Siaha district tih loh zawngah buatsaih a ni. VC 558-ah buatsaih tura ruahman ni mah se, Covid-19 vangin VC pariatah inthlan buatsaih theih a ni lo. VC 12-ah chuan party pakhat chiahin candidate an neih avangin inthlan buatsaih loin, chuhtu awmchhunte chu tlinga puan an ni.

Inthlan hi VC 538 ah buatsaih a ni a, general seat 1,795 leh hmeichhe tana hauh bik seat 623 awmin, a vaiin seat 2,418 a awm. VC 538-ah hian voter 4,45,336 awmin, mi 3,37,674-in vote an thlak a, vote tla chu 75.82% a ni a, VC inthlan hnuhnung ber kum 2015-a vote tla 67.42% aiin a ṭha zawk. VC inthlanah hian MNF party chuan seat 1,362 lain, VC 324-ah hnehna an chang a; anmahni dawttu Indian National Congress (INC)-in seat 601 lain, VC 96-ah an chak. Zoram Peoples' Movement (ZPM) party chuan seat 262 lain, VC 38-ah an chak a, BJP-in seat 21 la mah se, chak ber nihna VC an nei lo. Independent candidate-te'n seat 172 lain, VC 23 an la a, chak ber awm lohna VC 69 a awm.

Candidate nei zingah National People's Party (NPP), Mizoram People's Conference (MPC) leh Hmar People Convention (JPC)-te VC leh seat lâk an nei lo. Tarlan tawh angin, August 27-a Aizawl khawpuia local council 59-a inthlanah chuan MNF-in seat 262 lain VC 50-ah an chak a, Congress party-in seat 84 lain LC paliah an chak. ZPM party-in seat 21 lain, LC pakhatah an chak ber thung. Tuivamit LC-ah chuan seat awm zawng zawng panga chu independent candidate-te'n an la vek a; Chawlhmun, Phunchawng leh Venghluiah chuan party mala chak ber an awm lo. VC leh LC-a sorkarna siam thei party-te hian September 4, 2020 hmain chairman/president, vice chairman/vice president, treasurer leh secretary an inruat tur a ni a; inthlan kaihhnawih thil zawng zawng chu September 7, 2020-ah zawh vek tur a ni.