LPAI aiawhte'n Kawrpuichhuah endik

Kawrpuichhuaha Integrated Check Post (ICP) hmun tura ruahman chu nimin khan Ministry of Home Affairs hnuaia Land Ports Authority of India (LPAI) consultant-te'n a hmunah an enfiah.

Kawrpuichhuah ICP hmun tur enfiahtute hi LPAI consultant Capt. HC Dimri leh Sanjay Kumar Singh bakah, Mizoram sorkara Commerce & Industries department hotute an ni a; ICP ram chin tura ruahman bigha 65-a zau chu geographic coordinate system hmanga an lâk nghal bakah, a chhinchhiahna langsar takin an siam a, hmun sàn zawng leh hmun hniam zawng tehin an chhinchhiah a ni.

Tlabunga thuthar theh­darhtute zawhna chhangin LPAI con­sultant-te chuan, India ram pumah ICP 67 tihpuitlin tumin India sorkarin hma a lak mek thu leh, chu'ng zingah chuan Kawrpuichhuah ICP a tel thu an sawi.

(Phek 2 -ah zawm a ni)LPAI consultant-te chuan, Kawrpui­chhuah ICP tihpuitlinna tura detailed project report (DPR) chu pawm ngei a nih a beiseiawm thu an sawi a; sum leh páia hlâwkna bakah, ram pahnih inkara boruak ṭha vawn nun nan insumdawn tawnna a taka kalpui chu sorkar laipuiin a tuipui hle niin an sawi bawk.

Zawhna dang chhángin LPAI aiawhte chuan, India ram hmun hrang hranga ICP awm dan leh nihphung chu inang vek ṭhin mah se, Kawrpuichhuah chu hmun danga ICP hmun anga a zàwl ve loh avangin sum sèn a tam bik dawn thu an sawi a; ICP chuan ken tel tam tak a neih avangin tualchhung mite tan eizawnna kawng zau taka a inhawn tur thu an sawi bawk a ni.

LPAI consultant-te hi Commerce & Industries assistant director Ronald Lalchhuanawma, marketing officer C Lalthangkima leh Lungleia Land Revenue & Settlement department hotute'n an ṭawiawm.