UG result chhuakah 73.27% an pass

Mizoram University chuan October 19, Thawh­ṭanni khan under graduate (UG) final year/semester result a tichhuak a; a pumpuiah zirlai exam 4,243 zinga 3,109 (73.27%) a ni a, a pumpuia hmu sang ber chu Zoology-a mi JH Zorinpuii, Pachhunga University College (PUC) a ni.

MZU-in UG result a tihchhuah takah hian regular student bikah exam mi 3,818 zinga 2,839 (74.36%) an pass a, repeater aṭangin zirlai exam 425 zinga 270 (63.53%) an pass. regular leh repeater belhkhawmin zirlai exam 4,243 zinga 3,109 an pass a ni. 

Regular leh repeater belhkhawmin B.A-ah zirlai 3,506 zinga 2,533 (72.25%), B.Sc.-ah exam 491 zinga 369 (75.15%), B.Com.-ah exam 237 zinga 197 (83.12%%) leh, Home Science-ah exam (regular vek) pakua zinga pariat (88.89%) an pass.

UG-ah hian subject 24 a awm a, chu'ng zinga subject 18-ah chuan PUC-in topper an nei. Hrangbana College (HBC), Aizawl North College (ANC), Aizawl West College (AWC), Zirtiri Residential Science College (RSC) leh Higher and Technical Institute, Mizoram (HATIM)-te'n subject topper pakhat ṭheuh an nei a; Hindi-ah erawh topper an awm lo.