Adhaar card no. thehlut lote Gas subsidy tihtawpsak an ni Sorkarin ngaihhnathiam turin sorkar laipui ngen a tum

Thu dawn danin, sorkar lai-puia Petroleum & Natural Gas Ministry thuchhuak angin, July 2016 aṭang chuan cash transfer compliant (CTC)-te chauhin an bank account-ah gas subsidy sum an hmu thei tawh dawn a; CTC ni turin bank-ah leh gas agency-ah Aadhar card number thehluh a ngai.

Gas agency leh bank-a Adhaar card number la thehlut lote tan September 30, 2016 thleng thehluh theih a ni a, chumi chhunga thehlut hmante chu July 1 - September 30, 2016 chhungin gas an leina subsidy pawisa lut rih lo mah se, a hnuah a lût leh tur a ngaih a ni.

Kumin September thla ral hmaa thehlut hman lote erawh chu gas an lak tawhna subsidy pek an ni lo ang a, July-September 2016 chhunga gas an lakna subsidy chu an chán dawn a; Adhaar card number an thehluh hnua gas an lakna subsidy chauh bank account-ah thunsak an ni tawh ang.

Gas agency leh bank-te hnena gas consumer-te Adhaar card number sorkar laipuiin thehlut tura a tih hi Mizoram bikah inhriattir lâwkna a awm mumal loa sawi a ni.

Vanglaini palai zawhna chhangin, Food, Civil Supplies & Consumer Affairs (FCSCA) department hotute chuan, Adhaar car copy thehlut lote hnena gas subsidy pawisa bank account-a thun tawh loh tur thu hi nimin khan email-in an dawng chauh tih an sawi. Gas agency-te pawhin July 6, 2016-ah hriattirna an dawng chauh a, mipui hnenah an puangzar hmasa hman lo nia thu dawn a ni.

FCSCA hotute chuan, sorkar laipuiin Adhaar card a ngai pawimawh a, mipuiin an neih vek theihna turin an nawr na sawt hle tih an sawi a; chutih rualin, Mizoramah Adhaar card nei lo an la tam avangin Mizoram bik chu ngaihhnathiam (exempt) leh rih turin sorkar laipuiah ngenna an thlen dawn tih sawiin, "Kar leh Thawhṭanniah kan thawn hman ang," an ti.

Mizorama mi ṭhenkhat chuan Adhaar card thehluh loh vangin gas subsidy sum an dawn loh tur thu leh Adhaar card thehlut thuai tura hriattirna an mobile phone-ah SMS-in an dawng a ni.

Mipuiin eirawngbawlna gas an lâk a, sorkarin a man a tum ṭhensak (subsidise)-na sumte chu July 1, 2016 aṭang khan bank leh gas agency-a Adhaar card copy thehlut lote hnenah thun a ni lo a, Adhaar car copy thehlutte hnenah chauh thun a ni tawh dawn. Mizoram sorkar chuan hei hi ngaihven nghalin sorkar laipuiah hun pawtsei tura ngen a tum.