KHAWTHLIR

Silaiah ziah tur

Aizawl DC chuan thupek chhuahin, silai licence nei zawng zawngte'n an licence-ah unique identification number (UIDN) ziah luh vek tur a nih thu a tarlang a, "UIDN la ziak lo chuan Aizawl DC office Arms Branch-ah July 31, 2016 hma ziah luh vek tur a ni. UIDN nei lo chuan silai mu an lei thei tawh lo ang," a ti.

Hall hawng

Champhai College seminar hall thar chu Ningani khan parliamentary secretary TT Zothansanga'n a hawng. Hall sakna atan hian Lok Sabha MP fund Rs. 5,00,000 hman a ni a, bungraw hrang hrang leina atan RUSA aṭangin Rs. 2,35,000 hmuh niin, ceiling leh wiring tihna atan UGC aṭangin Rs. 1,00,000 hmuh a ni bawk.

PMKSY workshop

Prime Minister Krishi Sinchayee Yojana (PMKSY) hnuaia programme leh scheme hrang hrangte thlunzawma thawhho dan tur thlirhona, 'Workshop on Convergence of Project under PMKSY (Watershed Development' chu nimin khan Aijal Club-ah neih a ni.

Set top box chauh

Lunglei additional DC JH Lalrimawia chuan thuchhuah siamin, Lunglei khawpui huam chhung leh Hnahthial leh Tlabung huam chhung zawng zawngah July 31, 2016 zan dar 12-ah cable TV analog signal tihtawp a ni dawn a, digital set top box signal chauh pek a ni tawh dawn tih a tarlang. Cable TV operator-te chu an subscriber-te hnenah hun ral hmaa set top box neihtir vek turin a hriattir nghal bawk.

Crime review

Mamit district-a police hotute chuan, nimin khan SP C Lalnunmawia hoin a pisaah Crime Review Meeting an nei a, kumin January-June chhungin thubuai 82 ziah luh a nih thu an tarlang. Thubuai ziah luh zinga 33 chu MLPC Act kaihhnawih a ni. C Lalnunmawia chuan, "Rim tak leh taima taka kan thawhna leh inpekna vangin kan district a rálmuan phah a, theihtawp i chhuah zel ang u," a ti.