Press mite thisen pek chungchang zirtir A thlawna pek tlakhniam vangin ṭan lâk ngai

Association for Voluntary Blood Donation (AVBD) leh MJA-te chuan, nimin khan Aizawl Press Club-ah chanchinbumite tan thisen pek leh a kaihhnawih zirhona an buatsaih. He hunah hian Mizoramah a thlawna thisen pek (voluntary blood donation) a tlakhniam avangin ṭan lak a ngaih thu tarlan a ni.

'Training cum Awareness Cam-paign on Voluntary Blood Donation' programme hi AVBD president PC Lalhmingthanga'n a kaihruai a, MJA aiawhin vice president Zonunsanga Khiangte-in thu a sawi. MSACS deputy director Dr Sangzuala kaihhruaiin technical session hun hman a ni a, sawihona leh zawhna leh chhanna hun hman a ni.

MJA vice president Zonun-sanga Khiangte chuan, a thlawna thisen pek kawngah châwl loa inzirtirna kalpui reng a ngaih thu a sawi a, "Thisen pe ṭhinte hi an fakawm a, mi ngaihsanawm takte an ni. Thisen petu nih hi thil ropui tak a ni a, mi nunna chhantute an ni," a ti.

Aizawl Civil Hospital-a blood bank officer Dr K Rothangpuia'n 'Basic Blood Science & Donation Criteria' tih thupui a sawi a, mihringte thisen nihphung, thisen pe thei leh pe thei lote a sawifiah. Synod Hospital-a blood bank officer Dr B Lalnunthari'n 'Concept of Voluntary Blood Donation' tih thupui a sawi.

Dr B Lalnunthari chuan, phai lamahte mi ṭhenkhatin an tih
ṭhin, mahni thisen hralh leh mi thisen lei ang chi chu Supreme Court-in July 1, 1998-ah a khap tawh tih sawiin, a chhan pawh thisen hralhtu zinga tam tak chu hrisel tawk lo leh thisen thianghlim lo neite an nih vang a nih thu a sawi a; mi tu emaw tan bika pek pawh hmanhmawh thil a nih tawh avangin a risk a sang bik tih sawiin, "Pek bik nei loa a thlawna thisen pek hi a thianghlim ber ṭhin," a ti.

'Voluntary Blood Donation Scenerio of Mizoram' tih thupui sawitu C Lalnunnema, AVBD secretary chuan, Mizoramah kum 1974-ah thisen pek ṭan a nih thu leh voluntary donation chu June 15, 1992-ah ṭan a nih thu a sawi a, "Kum 1992 khan YMA Day-ah Saikhamakawn YMA member pali leh Dawrpui YMA member pahnihte'n a thlawnin thisen an pe a, anni hi a thlawna thisen pe hmasa ber kan hriat theihte an ni," a ti.

C Lalnunnema chuan, voluntary blood donation-ah Mizoram chu kum 2011-12 ah 91.08% leh kum 2012-13 ah 94.07% a tlin tawh laiin, a tlahniam leh a, kum 2015-16 agh chuan 75.82%-ah a tlathla leh tawh tih a sawi a, "India rama average pawh kan pha rih lo," a ti.

Hetih lai hian, pawl hminga a thlawna thisen pek ni lo, mimala pe a pung tial tial tih sawiin, kum 2011-12 ah unit 2,365, kum 2012-13 ah unit 3,862 leh kum 2014-15 ah unit 4,260 a nih thu a sawi bawk.

Training-a tarlan danin, Mizorama pawl hminga thisen pe zingah YMA hminga thisen pek chu kum thum chhung a tlahniam tial tial tawh. YMA hmingin kum 2011-12-ah unit 3,442, kum 2012-13 ah unit 2,788, kum 2013-14 ah unit 2,451 leh kum 2014-15 ah unit 1,780 a ni. Kum 2015-16 chhung khan Aizawl Civil Hospital bikah chuan Aizawl khawpui chhunga YMA branch 11 chiahin thisen an pe a ni.