ZNP-in BJP an thlàwpna an titawp

Zoram Nationalist Party (ZNP) chuan BJP an thlawpna an hnuhdawh thu an puang. ZNP hian BJP hi Lok Sabha MP leh AMC inthlanahte an lo thawhpui tawh a ni.

ZNP thuchhuah chuan, BJP-te chu thawhpui nuam an ti a, India ram hmasawnna an kalpui danah phei chuan fakawm an tih thu a sawi a, "Amaherawhchu, kum hnih chuang hret ro an rel chhung hian, an agenda thuhrûk (hidden agenda) Hindutva an kalpui na tual tual a, bâwng talh khap bakah biak-in suasam a hluar chho ta zel a ni," a ti.

ZNP tarlan danin, Central-a BJP sorkar hnuah India ramah dan inang tlang, Uniform Civil Code, Hindu duh dan mila hman a nih theih nan hma an la a, hnam tênau leh sakhaw dang vuantute dinhmun an tiderthâwng mek. Tun hnaiah khan Union Minister for Human Resources Development Ram Shankar Katheria-a'n India rama zirna chu Hindu sakhaw mila kalpui a nih tur thu a puang a; ram pum huapin tihluihnain Yoga Day an hmantir a, Mizoram Kohhran Hruaitute Committee (MKHC)-in thuchhuah a siam phah hial a ni.

BJP kalphungah state-te thuneihna a tlem nia sawiin, ZNP chuan, state-te chu Central lama hotute'n an palzût nasa hle niin an sawi a; BJP chu rin ngam harsa an tih thu leh Hindu ni lote tan ngaih ngam a har nia sawiin, "Kan sakhua leh Mizo nationalism hi tu'ma mitmei veng loa kan humhalh zel theih nan BJP hi thawhhopui zel ngam chi a ni dawn em tih uluk taka thlithlai phawt chungin, tun dinhmun atan chuan thawhhona aṭang hian ZNP chu kan inhnûkdâwk ta a ni," an ti.