BJP-in India hi Hindu ramah siam a tum: Lal Thanhawla

Chief minister Lal Thanhawla chuan, BJP-in India ram chu Hindu ramah siam an tum a, chumi lak ata chu lo inven mai tur a nih thu a sawi. hetihlai hian Mizo tam takin an hlauh Yoga chu hlauhawma a ngaih loh thu a sawi thung.

Nimina Congress Bhavan-a inkhawmah thu sawiin Chief Minister chuan, BJP-in India ram Hindu ramah siam an tum tih a chiang tih sawiin, "Sorkarna changtu azirin an tum tur a lawm. Lo inven mai tur. An la rawn nawrna dawn chauh," a ti a; tu pawhin sorkarna siam se Mizoramah chuan Kristian kaihhruai sorkar a nih reng dawn thu a sawi.

Kris-tiante tan Yoga hlauh tur a ni lo tih sawiin CM chuan, "Hlauh ngah lutuk nih leh Kristian nih hi a inhmeh lo," a ti.

Lal Thanhawla chuan Yoga tichhuaktu chu Kristian an ni lo tih sawiin, "An sakhua hruai luh tumnaah pawh duh leh hmang ang hmiang, an sakhua kan zui leh zui loh chu kan kut a ni. Rilru chhia leh ṭha hriatna kan nei vek a, chu chu kan hmang ṭangkai tur a ni. Yoga hi hlau loin keimahni kan inveng tur a ni," a ti.

Yoga chungchanga a ngaihdan sawiin, "Yoga hi hlauh tur a ni lo. Hriselna atan leh taksa invawnna atan a ṭangkai thei," a ti a; hlauh ngah lutuk chu thil ṭha nia a hriat loh thu a sawi.