BPL-a inchhál lo ngam turin chah

Champhai District Level Vigilance & Monitoring Committee for Rural Development Programmes chu nimin khan DC conference hall-ah an ṭhukhawm a; chairman Ronald Sapa Tlau, Rajya Sabha MP chuan, BPL dik tak ni lote chu BPL-a inchhál lo ngam turin a chah.

Ronald Sapa Tlau chuan, department hrang hrangte chu BPL titlem tura theitawpa ṭan la turin a hrilh a; mipuite chu BPL dik tak ni lo chu BPL-a inchhál lo ngam a, APL-a awm inchhuang zawk turin a ngen.

Meeting-a tarlan danin, Champhai district-ah hian MGNREGA hnuaiah job card nei 27,814-te tan ni 73 inhlawhna siamsak tawh a ni a, hna tam zawk, 70% chu agriculture kaihhnawihah atan hman a ni.

PMAY (IAY tia hriat ṭhin) hnuaia hmalakna chu sorkar laipuiin kalphung a thlak avangin kum hmasa lam aiin a tlahniam a, kuminah in 45 sak zawh tawh a ni. Naupang kum khat hnuai lam thi zat, Infant Mortality Rate (IMR) chu 26.58 (nau piang 1,000 zelah 26.58 an thi tihna) a ni.

Meeting-ah hian Champhai district-a MLA pali - JH Roṭhuama, H Rohluna, TT Zothangsanga leh T Sangkunga te an tel a; sorkar department hrang hrang hotute an tel bawk.