Minister hoin puantah zirna khar

Industries minister H Rohluna chuan Ningani khan Kawlkulh North community hall-ah puantah zirna, Kawlkulh Handloom Cluster khârna a hmanpui.

H Rohluna chuan, puantah chu Mizo society-a thil bet tlat, pi leh pu aṭanga thiamthil leh tun thleng pawha eizawnna atana chhawm nun tlak a ni tih sawiin, "Mizoramah puantah lamah hmasawnna a chak a, ṭhenawm state-tinah Mizo puan kan zuar thei ta hial a, a lawmawm hle. Tlangmite kutchhuak rau rauah Mizo kutchhuak hi a chhuanawm hle," a ti.

Industries Minister chuan, sorkarin puantahtu chher chhuah belh leh chhawm-dâwl zel a tum thu sawiin, "Mizoramah pawh Cluster Development Proggrame hmun 17 laiah kalpui a ni a, Kawlkulh Cluster hi a hmáwrbàwkna a ni," a ti a; Kawlkulh Handloom Cluster chu model cluster nih tum turin a fuih.

Industries director J Hmingthanmawia pawhin thu sawiin, puantah leh a kaihhnawihte chu Mizoram tan eizawnna káwl êng ber pawl leh mi tam tak tana eizawnna awm theihna a nih avangin kâwngvawn puantah kalsan a, hlâwk zawka puan tah a nih theih nan Kawlkulh Handloom Cluster buatsaih a nih thu a sawi.

Inkhawmah hian training chhuak mi 90-te chu puantahna in, workshed tur sakna atan Rs. 26,000 ṭheuh hlan a ni.