Zoram mipui manganna leh harsatna pawisa loah ZPM MLA-in MNF a puh

Tuirial bialtu MLA Andrew H Thangliana chuan, Covid-19 hripui vanga Mizoram mipui an mangan lai leh harsat lai pawh pawisa loa ZPM Legislature Party leader Lalduhoma chunga chêah MNF party leh sorkar hotute puhin, ram pum tan thil pawi leh mualphothlak a nih thu a sawi.

Nimina Saron Venga ZPM pary zawm tharte lawm luhna inkhawmah Andrew H Thangliana chuan, ram siamṭha turin mipui an ṭhangharh chho zela a hriat thu a sawi a, "Pu Lalduhoma laka MNF-in kut an thlâk hun kha hripui vanga kan mangan lai tak a ni. Kan mangan lai leh harsat lai pawh pawisa zo loa an che ta mai kha a mak a, ram pum tan thil pawi leh mualphothlak tak ni," a ti.

ZPM zawm tharte làwm luttu ZPM general secretary B Lalchhanzova chuan, an party zawm tharte chu ram siamna kawnga theihtawp chhuahpuiah sáwmin, "MLA emaw kan ni vek thei lo, mahse, kan vote hlu tak hmangin kan aiawh tur MLA kan thlang thei a, chu kan vote hlu leh thil ti thei tak chu ram siamṭhat nana hmang turin ka sawm che u a ni," a ti a; ZPM chu naupang tê ni mah se, a ṭhang duang hle niin a sawi.

B Lalchhanzova chuan, ZPM party zawm thar ni tin hmun hrang hrangah an awm reng tih sawiin, "Hei hi mipuiin MNF leh Congress-ah beiseina an neih tawh loh vang te, party pahnihte hi an nin tawh vang leh ZPM-ah beiseina an neih vang a ni. ZPM party-in sorkarna kan siam chuan mipui beisei ang ngeiin hna kan thawk dawn a ni," a ti.

Inkhawmah hian AMC inthlan huna Ward IX-a ZPM candidate tur Zarzokima pawhin thu a sawi bawk.