Thenzawl leh Tlabungah zirlai tiṭha chawimawi

MZP sub-headquarters, Then-zawl chuan nimin khan an huam chhunga zirlai tiṭhate chawimawina hun Thenzawl Joint YMA Hall-ah an buatsaih a, MLA Chalrosanga Ralte-in a hmanpui. MZP sub-hqrs., Tlabung pawhin nimin khan Tlabunga HSLC leh HSSLC pass tharte lawmpuina an hlan a, Vanglaini editor K Sapdanga'n a hmanpui.

Chalrosanga Ralte chuan, zirlaite chu hmathlir leh tum fel tak nei tura chahin, "Tum leh hmathlir nei loa lehkha zir ringawt hian awmzia a awm tawh lo. Kan zirlaiah pass pawh ni ila, a hnu leh zelah hlawhtlin a har ṭhin. Hna a vàn tawh avangin khawvel ram dang leh India ram (state) dangahte pawh thawk thei tura inpuahchah a pawimawh," a ti.

Zirlai chawimawina hlante hi HSLC-ah leh HSSLC-a first division-a pass mi 25 leh distinc-tion-a pass mi pariat an ni.

Mizo Zirlai Pawl, Sub-Hqrs Tlabungten vawiin khan Tlabunga pawl sawm leh pawl sawmpahnih zirchhuak zirlai 43 hnenah chawimawina thuziak an hlan.

Tlabung community hall-a HSLC leh HSSLC pass thar mi 43-te lawmpuina inkhawmah K Sapdanga chuan, sorkarah ringawt innghat lo turin zirlaite a chah a, "Sorkar hna tinzawn ringawtin lehkha kan zir ang tih a hlauhawm. Taimakna nena kan beih chuan eng hna pawh thawk ila hlawhtlinna a awm a ni," a ti.

K Sapdanga chuan, thiamna nena inhen lo hna a awm lo tih sawiin, eng hna pawh dik leh rinawm taka thawk apiang an hlawhtling ṭhin tih a sawi a; chhawrtlak leh hmantlak ni thei tura inbuatsaih a ngaih thu a sawi bawk.

Inkhawmah hian Tlabung MZP-te chuan kumina Mizo nau piang mi pali hnenah chawimawina thuziak an hlân bawk.