Khawzawlah chenna in 5 ṭhiah rel

Khawzawl District Disaster Management Authority (DDMA) hotute nimina an chairman Zothanmawia, bawrhsap hoa ṭhukhawm chuan, Khawzawl Vengthara lei tlahniam ṭhin chu tun hnaiah a chêt leh avanga chhungkaw pangain an chhuahsan tawh chenna inte thla ruk chhung ngeia ṭhiah an rêl.

Khawzawl DDMA hotute ṭhukhawm chuan, in pangate chu thla ruk chhunga ṭhiah a nih theih nan thupek chhuah an rèl bakah, in ṭhiah a nih hunah a hmun ngaiah in sak khap an rél a; chhungkaw pangate tan Housing for All hnuaiah in saksak dan tur ngaihtuah ni se, an ti.

Khawzawl Vengthar lei tlahniam huam chhungah in sak thar, lei laih leh in zauh ang chite khap an rel a; Geo Technical In­ves­tigation nei turin Mizoram sorkarah thlen a, IIT-Guwahati emaw IIT-Kharagpur emaw aṭangin mithiamte chah chhuak tura rawtna thlen an rél bawk.

DDMA ṭhukhawm chuan, Khawzawl district-a khua leh veng tinah District Management Plan felfai tak a awm vek theih nan hmalak an rél bawk a ni.