KHAWTHLIR

August 29, Inrinni khan ṬKP, Paithar Pastor Bial chuan thisen pek rûnpui an huaihawt a, mipa 98 leh hmeichhia 25-te'n Lawngtlai District Hospital tan thisen unit 123 an pe. Ramhlun Vengchhak Branch KṬP pawhin Synod Hospital blood bank-ah thisen unit 14 an pe a, a petute mipa 10 leh hmeichhia pali an ni.

AMC Ward-V councillor Rosiamngheta chuan August 29, Inrinni khan pianphunga rualbanlo Lalrammawii, Vaiva­kawn hnenah TVS scooter (scooty) Ntorg 125 a pe. Lalrammawii hi AMC office-a thawk a ni a, mi dang tibuai loa pisa a kai theih nan a khalh theih tura siam danglam scooter thar chu Rosiamngheta hian a pe a ni. Lalrammawii chuan, "Ka harsatnate mi a lo zawt chhuak a, scooty min pe hi ka lawm tak zet a ni. Pathianin malsawm let rawh se," a ti.

Aizawla awm 46 Assam Rifles-te chuan August 29, Inrinni khan Dil­tlang, Champhai district-ah methaphetamine (meth) mûm 1,00,000 an man a, Excise & Narco­tics department hnenah an hlân. Meth an man hi cheng nuai 350 vel hùa chhût a ni. Ser­chhipa awm AR-te pawhin August 29 vêk khan Mél­bûk, Champhai district-ah kuhva rah (areca nut) ip 80 leh a neitua puh mi pakhat, Vairengte mi nia insawi an man bawk a, cheng nuai 11.24 vel hùa chhût a ni.

Covid-19 léng karah damlote'n awlsam zâwk leh mahni in aṭanga doctor an ràwn theih nan Ministry of Health & Family Welfare chuan ruahmanna a siam a, Telemedicine E-Sanjeevani OPD Application duan a ni. Mizorama National Health Mission pawhin mipuiin ṭangkai taka an chhawr thuai theih nan chak takin hma an la a, Teleconsultation Service E-Sanjeevani OPD hmanga mipuiin doctor an ràwn theihna tur a ruahman. Doctor ráwn duhte chuan Playstore-ah eSanjeevaniOPD-National Teleconsultation Services download tur a ni a, Thawhṭanni aṭanga Zirtawpniah tlai dar 2-4 inkarah doctor-te ràwn theih an ni.

State Referral Hospital-ah nimin khan Covid-19 vei pakhat dah luh thar a ni a, ani nen hian SRH-ah hripui vei vanga enkawl mek mi 72 an awm. SRH-ZMC Bulletin tarlan danin, ICU-a enkawl ṭhin mi pahnih chu August 29 khan ward-ah sawn an ni a, ICU-a enkawl mek an awm lo. Isolation ward-ah mi 71 awm­in, an zinga pahnihin khawsik sang vak lo an nei a; SICU-ah pakhat awmin, harsatna lian tham a nei lo.

August 29, Inrinni thleng khan Covid-19 avangin Mizorama quarantine facilities hrang hrang leh mahni ina khunghran mi 1556 an la awm. District hrang hranga khung­hran awm zat chu Aizawl­ah 737, Champhaiah 43, Hnahthialah 50, Khawzawlah 8, Kolasibah 330, Lawng­tlaiah 40, Lungleiah 120, Mamitah 32, Saitualah 8, Serchhipah 137 leh Siaha-ah 51 a ni.