Minister-in Start-Up Entrepreneurship Development Programme hnuaia ṭanpuina a sem

Social Welfare department (SWD) minister Dr Beichhua chuan nimin khan Reiek community hall-ah entrepreneur-te tan Start-Up Entrepreneurship Development Programme hnuaiah bungrua a sem.

Dr K Beichhua chuan, Covid-19 léng vanga kut kuangkuaha ṭhut reng tur a ni lo tih sawiin, "Hri léng vanga harsatna hrang hrang karah theihtawp chhuahin chief minister Pu Zoramthanga kaihhruai sorkar chuan hma a la mek zel a ni," a ti.

SWD Minister chuan, sorkar hnain Mizoram ṭhalaite a daih dawn lo tih a chian thu a sawi a, "Mahnia intodelh tura eizawnna bul ṭan lamah tun aia nasa zawka ke kan pên a ngai tak zet a ni," 

a ti bawk.

Bungraw sem hi Start-Up Entrepreneurship Development Programme hnuaia Reiek RD Block chhunga mite tan a ni a, Ministry of Tribal Affairs hnuaiah Social Welfare & Tribal Affairs department kaltlanga sanction hmuh niin, Mizorama buaipuitu (implementing agency) chu Mission Foundation Movement (MFM) a ni.

Reiek RD Block chhunga entrepreneur awm tawh sa mi 120 leh a thar mi 180-te hnenah ṭanpuina pek a ni dawn a, bungrua pek turte chu Rs. 45,000 hû a ni. Programme kalpuina atan Ministry of Tribal Affairs aṭangin cheng nuai 335 hmuh a ni a; Reiek Block chhunga khaw 21-ah BPL chhungkua aṭangin self help group thlan a ni bawk.