Covid-19 vanga harsatna thleng thei Hmachhawn turin kan inpuahchah zel - Health Minister

Health & family Welfare minister Dr R Lalthangliana chuan, Covid-19 vanga harsatna thleng theite hmachhawn turin sorkar a inpuahchah zel thu a sawi.

August 29, Inrinnia Covid-19 donaa hmalakna chungchang CS conference hall-a thlirhonaah Dr R Lalthangliana chuan, sorkar laipuiin kumin kum tàwpah Mizorama Covid-19 vei chu mi 5,000 chuang turin a chhût tih sawiin, "Harsatna hmachhawn tur hian a theih ang angin kan inpuahchah zel. Covid-19 hi natna hriatthiam harsa tak mai, la zir chian mek a nih avangin rorel thiam a har em em a, mipui thlàwpna kan mamawh em em a ni," a ti.

Health Minister chuan, Covid-19 donaa thawktu indaih lohna phuhru turin hmalak a nih thu sawiin, "Covid-19 hri kai enkawlna tur CCC indaih lohna a nasa a, positive an pun thut hian a manganthlak ṭhin," a ti a; Covid-19 vanga thi an awm lohna turin theih­tawp an chhuah reng dawn a sawi.

Task Group on Documentation in Co­vid-19 donaa hmalaknate uluk takin an la khawm tih sawiin Minister chuan, "Report an siam dawn a, hei hi ṭhangtharte tan pawh ṭangkai tak a la nih ngei a rinawm," a ti.

Dr R Lalthangliana chuan, Aizawl tih loh district 10-ah Truelab Quattro Real Time Quantitative Micro PCR bun a nih tawh thu sawiin, "A tam zawk hi chu kár thar (tun kar) tìr lamah hman ṭan theih a nih a beiseiawm," a ti a; khawl pakhatin ni khatah swab sample 100-200 vel a endik theih dawn thu a sawi.

Ṭhutkhawmah hian Covid-19 veite enkawlna hmun tur covid care centre (CCC) leh dedicated covid health centre (DCHC) indaih lohna phuhru tura hmalak a nih thu te, a ruala mi 2,500 enkawl theihna tur mamawh a nih thu te, CCC atana ruahman ṭhenkhat, a awmna khawtlangin an phal loh avanga harsatna a awm ṭhin thu te, district tina CCC ruahman chu hman theih a nih chuan mi 2,000 vel an len theih tur thute tarlan a ni.

Contact Tracing Team hotute chuan, local task force-te nen an thawhhona a ṭhat avangin hnu chhui a awlsam thu an sawi a, "Contact tracing tihnaah harsatna lian a thlen loh nan positive-te leh an contact-te'n zêp nei lo se a awlsam lehzual ang," an ti. Sample Collection Team pawhin an hmalakna an tarlang.

Aizawl district-ah Sample Collection Team pariat an awm a; Aizawl East CMO hnuaiah team pahnih, Aizawl West CMO hnuaiah leh leh state IDSP hnuaiah team pathum ve ve an awm a ni.