Ramria duty police thi an awm chuan Sorkarin cheng nuai 35-in a rál dawn

Minister R Lalzirliana chuan nimin khan Assam leh Mizoram inrìnaa awm Thinghlun khua a tlawh a; Assam ramria duty police zingah an duty avanga nunna chán an awm chuan Mizoram sorkarin ràlna (ex-gratia) cheng nuai 35 a pe dawn tih a puang.

R Lalzirliana chuan, Mizoram leh Assam ramria buaina vanga Thinghlun khaw mite'n harsatna an tâwk chu pawi a tih thu sawiin, "Hei hi Thinghlun khawtlang tawrhna mai ni loin, Mizoram pum tawrhna leh harsatna a ni," a ti a; ramria duty-te chu ram leh hnam humhalh tura awm an nih angin theihtawp chhuah zel turin a sáwm.

Pi leh pute aṭanga Mizote'n hmun an luah ṭhin chu humhalh a ṭul thu sawiin R Lalzirliana chuan, "Discipline ṭha tak nena sipai duty ka hmuh hian min tilawm a, a thlamuanthlak hle. Mamawh in nei a nih chuan inthlahrung loin thuneitute hnenah thlen zel ang che u," a ti.

Minister sawi danin, Assam ramria sipai duty nunna chán an awm chuan Mizoram sorkarin ex-gratia cheng nuai 35 a pek dawn bakah, an pension thlengin an thla hlawh pangngai an nupui fanaute'n an la dawn. An chhungte eizawnna tur sorkarin a theih ang angin a ngaihtuahsak bawk ang.

R Lalzirliana hian ramria duty-te tan water cooler, syntex leh refrigerator a pe a, Thinghlun khawtlang tan VCP hnenah Rs. 10,000, Langkaih Group YMA tan Rs. 10,000, Thinghlun MHIP tan Rs. 5,000, IR duty-te chawhmeh man atan Rs. 5,000 a pe bawk.

Minister hi Mamit bialtu MLA H Lalzirliana leh Aizawl West-I bialtu MLA Zothantluanga ten an ṭawiawm a; Kanhmun pawh tlawh nghalin, ramria chêng Mizote an thlamuan a ni.