MNYF-in PRRS len chhanah sorkar an puh High Court-ah Mizoram sorkar khin an tum

Mizo National Youth Front (MNYF) chuan Mizorama vawk natna hri PRRS a len chhanah leh dan loa foreign aṭanga vawkte la lutah Mizoram sorkar an puh a, High Court-ah khin an tum.

MNF ṭhalaite hian Inrinni khan Aizawl Press Club-ah thuthar thehdarhtute an kawm a, an president K Vanlalvena chuan Mizoram sorkarin dan loin Myanmar aṭanga vawk lakluh phalna Congress party worker hnenah an pe tih sawiin, "ADCC executive member C Vanlalhmuaka, Champhai Zotlang hnenah vawk lakluh phalna special permit an pe," a ti.

MNYF President sawi danin, Aizawl Custom Division-a dy. commissioner leh Trade & Commerce director chuan order inṭawm siamin, ni 1.1.2010 khan C Vanlal-hmuaka hnena special permit pek chu an cancel a, hetah hian danin thuneihna a pek chinin a huam loh vang a nih thu tarlan a ni. Hemi hnu hian Trade & Commerce director chuan order siam lehin C Vanlalhmuaka special permit a tinung leh a, hetah hian Aizawl Custom Dvision-a dy. commissioner chuan hming a ziak tawh lo.

Foreign aṭanga vawk lakluh phalna pe turin Mizoram sorkarin thuneihna a nei lo a, Mizoram sorkarin special permit an pe hi India Custom Act, 1962, The Foreign Trade (Development and Regulation) Act leh Livestock Importation (Amendment) Act, 2011 bawhchhiatna a ni.

K Vanlalvena chuan Lalruatkima, MLA zawhna Mizoram sorkarin a chhan dan chuan Myanmar aṭangin vawk 42,036 lakluh a nih thu sawiin, "Heng vawkte hi special permit an pek C Vanlalhmuakia supply a ni. Vawk zingah hian 1037 chauh endik a ni a, an endik zingah hian vawk pahnih chu PRRS vei mek an nih thu Vety jt. director Hmarkunga chuan Champhai Town Hall-ah a sawi a ni," a ti.

March - April, 2011 a Myanmar-ah PRRS avanga vawk 1000 chuang a thih bakah damlo tam tak an awm laiin March, 2012 ah C Vanlalhmuaka'n a special permit hmangin Myanmar aṭanga vawkte a lakluh a sem kual nia sawiin K Vanlalvena chuan, "Heng vawkte phurtu motor hi harsatna siam sak lo tura hriattirna Champhai SP leh DSP ten seal chhuin hriattirna an siam sak a ni," a ti a, vawkte hi district hrang hrangah sem a nih thu a sawi.

K Vanlalvena chuan C Vanlalhmuaka hian Myanmar aṭanga a vawk lakluhte an phur chhuah dawnin, driver hnenah Ruantlanga Vety doctor C Laldailova signature awm sa a ken tir ṭhin nia sawiin, "Hetianga lehkha fill-up chawp turin doctor hming sign sa a kawl ṭeuh tih a hnen aṭanga vawk leitute aṭangin report dawn a ni a, a ṭul anga enfiah turin leh action la turin Mizoram sorkar kan phut a ni," a ti.

MNF ṭhalaite chuan thil awm dan an zirchianna hrang hrang aṭangin Mizorama PRRS len chhan chu Mizoram sorkarin Myanmar aṭanga a chawk luh ngei a ni tih rinhleh rual a ni lo tih sawiin, "A changtu minister, department leh mimal mawhphurtute chunga action lak a nih ngei theihna atan a ṭul angin hma kan la zui zel dawn," an ti a, PRRS avanga vawk thi chhungte zângnadawmna pe ngei turin sorkar an phut.

Zawhna chhangin K Vanlalvena chuan PRRS chungchangah hian High Court-a an kal ngei tur thu a sawi a, "Dan loa special permit pe a, foreign aṭanga vawk an lakluh avangin Mizoram sorkar hi High Court-ah kan khing ngei ang. MNF ṭhalai ang chuan a rem kher lo anga, mimal hminga tih pawh a ngai mai thei," a ti.