Hriselna chungchang sawihonaah Health minister a tel

Federation of Indian Cham-bers of Commerce and Industry (FICCI) leh Public Health Foundation of India (PFHI) ṭangkawp chuan July 8-9 khan Guwahati-ah hmarchhak huapa hriselna chungchang intawhkhawmna leh sawihona ‘North East Connect – Health Care Conclave, 2016 an buat-saih a, Health minister Lal Thanzara khualzahawm a ni.

Lal Thanzara chuan India-in hriselna leh damlo enkawlna kawngah hmasawnna tam tak a nei chu lawmawm a tih thu sawiin, "Ram chhung hmun
ṭhenkhatahte heng hmasawnna hi pheikhai rual taka a thleng lo erawh a lungchhiat thlak. Hmarchhak state zawng zawnga medical college awmte belhkhawm hian India ramah state lian pawla, state pakhata an medical college neih zat pawh a tluk lo," a ti a, hmarchhak bialin ramchhung hmun dang anga hma a sawn theihna atan FICCI leh PHFI hruaitute chu ngaihtuahna leh rilru seng turin a ngen.

Health Minister chuan Mizoram leh hmarchhak state ṭhenkhatah cancer hrang hrang a hluar thu sawiin, "Duh angin khawl leh hmaraw ṭha kan neih loh avangin ram chunga a hmunpui leh khawpui lian ah te inentir turin mi tam tak an kal a ngai ṭhin a, hei hian state sum dinhmunah nghawng lian tak a nei fo ṭhin a ni," a ti a, Hlawkna ngawr ngawr ngaihtuah loa mipuite hamṭhatna ngaihtuaha a, hmarchhak state-te pui turin mithiam kalkhawmte a sawm.

North East Connect – Health Care Conclave 2016 ah hian damlo inenkawlna
ṭha zawk leh hriselna kawnga thawktute tha tih chak leh an intuaihriamna (capacity building) chungchang te, mitin tana inenkawlna huapzo chungchang te, khawvel hmun changkang zawkte anga hriselna ruangam leh ruhrel din a nih theih nan a sum hnar dap (financing world class healthcare infrastructure) chungchangte leh damlote tan inenkawlna kawng dang dap chungchangte sawiho a ni.

Sorkar thuchhuah tarlan danin, programme zawhah Lal Thanzara hian FICCI hruaitute a kawm a, Mizoramah con-clave buatsaih ve turin a sawm a, nakkum velah road map siama, programme duan an tum thu a hrilh.