Tlawng lei dawh thar a rinawm tawk tih finfiah

Lengpui panna kawnga Tlawng lui kanna tur lei (bailey bridge) tunhnaia dawh zawh tak chu a rinawm leh awm loh te, a chak tawk leh tawk lohte Inrinni khan engineer-te'n an endik a, a chak ṭha tawk niin an sawi.

PWD highway division-I sr. EE H Zoramliana leh engineer dangte'n Inrinni khan truck metric-ton 20 (quintals 200) phurh hmangin an endik a, lei hi nutbolt hmanga kilhkhawm a ni a, a lai tak kul dan (deflection) chu inches 10 vel (mm 254) a ni.

Deflection zat hi bridge siamtu company Sibha In-dustries-te'n deflection phal chin an tih 381 mm (15 inches) aiin 92 mm (3.6 inches) in a tlem zawk a, chuvangin lei hi motor lian a rih zawng metric ton 20 chinin zawh chu him tawk tur a ngaih a ni.

Truck quintals 200 phurin a zawh lai hi uluk takin an enfiah a, lei lai tak load la loa inches 10 vela a kul chu rit phurin a zawh lai hian a kul dan (deflection) chu inches 11.38 (mm 289) a ni a, a kul belhna chu inches 1.38 chauh a nih avangin a rinawm tawkah engineer-te chuan an ngai a ni.

He lei hi ton 20 aia ritphur kal phal a nih loh thu PWD hotute chuan an sawi a, ritphurin lei a zawh laiin dim taka kal tur leh, lirthei zawhtute chu darkar khata km 10 aia chaka tlan lo turin an ngen.

Tlawng lei tawntirh ve veah hian vengtu dah a ni a, anni hian lei zawh tur motor lian ritphurte chu an endik ṭhin a ni.