Doctor ngaidam turin IMA-in an ngen

Indian Medical Association (IMA), Mizoram State Branch chuan August 29, Inrinni khan thuchhuah siamin, Covid-19 vei doctor, swab test result nghah mek laia futsal khel chu ngaidam turin Mizoram mipui an ngen.

IMA Mizoram Branch chuan, an member pakhat, ZMC-a Covid-19 enkawlnaa thawkin hripui a vei tih July 20, 2020-ah hmuh chhuah a nih thu tarlangin, "Test result nghah laiin a ṭhiante nen an lo inkhelh avangin mi eng emaw zatin harsatna an tawh phah a, a bikin Durtlang Leitan phei chu lockdown hial ngai khawpa harsatna an tawh phah avangin pawi kan ti hle," an ti.

An member-in hripui a kai chu pawi an tih thu sawiin IMA chuan, "A thil tihsual palh hi pawi a ti em em a, a eizawnna leh a hma lam hun zel ngaihtuah chunga ngaidam turin mipui kan ngen a ni," an ti a; Covid-19 donaa a hmatáwnga thawkte dinhmun derthâwnzia chu mipuiin an hriatpui tih an hriat thu leh, mi dang pawh kai palh thei an nih avangin ṭawngṭaisak reng turin mipui an ngen a ni.

IMA, Mizoram chuan, Covid-19 chu hri danglam tak, a hnathawh dan inang lo tak a nih avangin inven kawngah leh a veite enkawl danah tih dan ṭha ber hriatthiam a har hle tih sawiin, "Hri vei mekte enkawlnaa hma latu frontline worker, a bikin medical lama thawk, damdawi-in, CCC leh sample collection team-a thawkte hi hri léng laka derthâwng berte an ni àwm e," an ti. India ramah Covid-19 vangin medical doctor 200 chuang an thih tawh thu leh Mizo zingah pawh doctor pangain hripui an kai tawh thu an sawi bawk.