KHAWTHLIR

Thisen pe

Inrinni khan SAY Central South Division chuan Aizawl Civil Hospital tan thisen unit 120 an pe a, a petute mipa 96 leh hmeichhia 24 an ni. Armed Veng Branch KṬP pawhin an branch golden jubilee lawmna atana Synod Hospital tan thisen unit 57 an pe a, a petute mipa 46 leh hmeichhia 11 an ni.

Lehkhabu tlangzarh

Lalzarzova Khiangte lehkhabu ziah Mizo Ṭawng Grammar & Composition tih chu Inrinni khan Aijal Club-ah parliamentary secretary Joseph Lalhimpuia'n a tlangzarh. Joseph Lalhimpuia chuan Mizo ṭawng a ral chuan Mizo hnam a ral tur thu a sawi.

Free clinic

SBI, Aizawl Main Branch chuan Inrinni khan an office-ah pensioner leh kum lama upate tan a thlawna inentirna 'free clinic' an buatsaih a, mi ṭhahnem tak an in entir a, a thlawnin damdawi an pe nghal.

Lok Adalat

Kolasib Lok Adalat chu Inrinni khan Kolasib District Court-ah an ṭhukhawm a, thubuai 27 an ngaihtuah a, panga an chingfel. Thubuai an ngaihtuah aṭang hian leiba Rs. 11,520 an hmu let a ni.

Tla hlum

H Lalnunhlima (31), Zawlnuam Ṭhuampui Veng chu Inrinni zing dar 9:30 vel khan an veng field bula tuikhuahah a tla hlum. Thudawn danin, H Lalnunhlima hi a insil lai a chesual a, a tlak aṭanga rei loteah a ruang lak chhuah nghal a ni.

Huan neitute pe

KVK Lawngtlai chuan Inrinni khan Kawlchaw West Mango Grower Association member-te hnenah theihai enkawlna atan foot sprayer an pe a, rannung laka theihai ven dan an zirtir nghal.

MLA-in tlawh

Saiha bialtu MLA Dr. K Beichhua chuan tun hnai khan Tuisih Supply kudam a tlawh a, buhfai dinhmun a enfiah a, hemi hnu hian Tuisih community hall-a vantlang inkhawm buatsaihah thu a sawi.